ഫ്‌ളാറ്റ് വാടകയ്‌ക്കെടുത്ത് ചീട്ടുകളി; വൻ സംഘം അറസ്റ്റിൽ

എറണാകുളം: കോതമംഗലത്ത് ഫ്‌ളാറ്റ് കേന്ദ്രീകരിച്ച് ചീട്ടുകളി നടത്തിയ വൻ സംഘം അറസ്റ്റിൽ. സംഭവത്തിൽ ഒമ്പത് പേരെ കോതമംഗലം പോലീസ് അറസ്റ്റ് ചെയ്തു. കൂടാതെ ചീട്ടുകളി നടന്ന ഫ്‌ളാറ്റിൽ നിന്നും 47,570 രൂപയും കണ്ടെടുത്തു. ജില്ലാ പോലീസ് മേധാവി വിവേക് കുമാറിന് ലഭിച്ച രഹസ്യ വിവരത്തെ തുടർന്ന് നടത്തിയ തിരച്ചിലിലാണ് പ്രതികൾ പിടിയിലായത്. എച്ചിത്തൊണ്ട് ഗ്ലോറിയാഗ് ഫ്‌ളാറ്റിൽ നടത്തിയ പരിശോധനയിലാണ് പ്രതികൾ പിടിയിലായത്.

സംഭവത്തിൽ കോട്ടപ്പടി സ്വദേശികളായ ഷാജഹാൻ, മുഹമ്മദ്, മൊയ്ദീൻ, എടമങ്ങാട്ട് സിജു, ലിജോ ചിറ്റേത്തുകൂടി ഷമീർ, നെല്ലിക്കുഴി സ്വദേശി മണക്കാട്ട് സലി, കോണേത്ത് കാസിം, കുത്തുകുഴി സ്വദേശിയായ പ്ലാക്കാട്ട് ജനീഷ് എന്നിവരാണ് പിടിയിലായത്. കൂടാതെ ഇവിടെ നിന്നും ഒരു കാറും സ്‌കൂട്ടറും നാല് ബൈക്കുകളും മൊബൈൽ ഫോണുകളും കണ്ടെടുത്തിട്ടുണ്ട്. പ്രതികളിൽ നിന്നും കണ്ടെത്തിയ പണവും വാഹനവും ഉൾപ്പെടെ കോടതിയിൽ ഹാജരാക്കി.