കൊല്ലം: മദ്യപാനികൾക്ക് മദ്യം എന്ന വ്യാജേന കോള നൽകി പറ്റിച്ച യുവാവ് അറസ്റ്റിൽ. മദ്യക്കുപ്പികളിൽ കോള നിറച്ചാണ് ഇയാൾ തട്ടിപ്പ് നടത്തിയത്. ചങ്ങൻകുളങ്ങര അയ്യപ്പാടത്ത് തെക്കതിൽ സതീഷ് കുമാറാണ് പിടിയിലായത്. ഓച്ചിറ ആലുംപീടിക പരിസരത്തുള്ള ബിവറേജിലും ബാറിലും മദ്യം വാങ്ങുന്നതിനായി എത്തിയവരെയാണ് ഇയാൾ കബളിപ്പിച്ചത്.
ഇവിടെ മദ്യം വാങ്ങാനെത്തുന്നവരെ കോള കുടിപ്പിക്കുന്ന യുവാവിനെയാണ് നാട്ടുകാരും പ്രദേശവാസികളും ചേർന്ന് പിടികൂടിയത്. മദ്യം വാങ്ങാനെത്തുവരോട് വിലകുറച്ച് മദ്യം നൽകാമെന്ന വ്യാജേനയാണ് തട്ടിപ്പ് നടത്തിയിരുന്നത്. മദ്യ കുപ്പിയിൽ കോള നിറച്ച് വിൽക്കുകയാണ് ഇയാളുടെ രീതി.
രാത്രിയിലും ബിവറേജിൽ വലിയ ക്യൂ ഉള്ളപ്പോഴും ബിവറേജ് അടയ്ക്കുന്നതിന് തൊട്ടുമുൻപുമാണ് ഇയാൾ ഇത്തരത്തിൽ മദ്യമാണെന്ന പേരിൽ കോളവിൽപ്പന നടത്തിയത്.മദ്യം വാങ്ങുന്നയാൾ കുടിച്ചു നോക്കുമ്പോൾ മാത്രമാണ് കബളിപ്പിക്കപ്പെട്ട വിവരം തിരിച്ചറിയുന്നത്. നിരവധി പരാതികൾ ബിവറേജസിന്റെ മാനേജർക്ക് ലഭിച്ചതിന്റെ അടിസ്ഥാനത്തിൽ സിസിടിവി ദൃശ്യങ്ങൾ പരിശോധിച്ചാണ് തട്ടിപ്പ് വീരനെ കണ്ടെത്തിയത്.
