കൊളംബോ: ഏഷ്യാ കപ്പിലെ സൂപ്പര്ഫോര് പോരാട്ടത്തില് ശ്രീലങ്കയെ 41 റണ്സിന് കീഴടക്കി ഭാരതം ഫൈനല് ഉറപ്പിച്ചു. ഭാരതത്തിന്റെ 214 റണ്സ് വിജയലക്ഷ്യം പിന്തുടര്ന്ന ശ്രീലങ്കന് ഇന്നിങ്സ് 41.3 ഓവറില് 172 റണ്സില് അവസാനിച്ചു. തുടര്ച്ചയായ രണ്ടാം മത്സരത്തിലും തിളങ്ങിയ സ്പിന്നര് കുല്ദീപ് യാദവിന്റെ (നാല് വിക്കറ്റ്) മികവിലാണ് അനായാസ വിജയം
ബൗളിങ്ങിലെന്ന പോലെ ബാറ്റിങ്ങിലും ഗംഭീര പ്രകടനം കാഴ്ചവെച്ച ദുനിത് വെല്ലാലഗെയാണ് ലങ്കയുടെ ടോപ് സ്കോറര്. എട്ടാമനായി ക്രീസിലെത്തി പുറത്താകാതെ 42 റണ്സാണെടുത്തത്. ധനഞ്ജയ ഡിസില്വ 41 ഉം ചരിത് അസലങ്ക 22 റണ്സുമെടുത്തു.
ലങ്കയെ തുടക്കത്തിലെ തകര്ച്ചയിക്ക് തള്ളിവിട്ട് ബുമ്രയും സിറാജും ചേര്ന്ന് പ്രതിരോധത്തിലാക്കിയിരുന്നു. ലങ്കന് ഓപ്പണര് പാതും നിസങ്കയെ തന്റെ രണ്ടാം ഓവറിലെ ആദ്യ പന്തില് തന്നെ വിക്കറ്റിന് പിന്നില് കെ എല് രാഹുലിന്റെ കൈകളിലെത്തിച്ച ബുമ്ര പിന്നാലെ സ്ലോ ബോളില് കുശാല് മെന്ഡിസിനെ പകരക്കാരനായി ഇറങ്ങിയ സൂര്യകുമാര് യാദവിന്റെ കൈകളിലെത്തിിച്ച് ലങ്കക്ക് ഇരട്ടപ്രഹരമേല്പ്പിച്ചു. ദിമുത് കരുണരത്നെയെ സ്ലിപ്പില് ശുഭ്മാന് ഗില്ലിന്റെ കൈകളിലെത്തിച്ച മുഹമ്മദ് സിറാജും ആഞ്ഞടിച്ചതോടെ ലങ്ക 25ന് 3ലേക്ക് കൂപ്പുകുത്തി.
99 ന് 6 എന്ന സ്കോറില് പരാജയം ഉറപ്പിച്ച ലങ്കയ്ക്ക് ഏഴാം വിക്കറ്റില് അര്ധസെഞ്ചുറി കൂട്ടുകെട്ടുയര്ത്തി ധനഞ്ജയ ഡിസില്വയും ദുനിത് വെല്ലാലെഗെയും പ്രതീക്ഷ നല്കിയെങ്കിലും ധന!ഞ്ജയ ഡിസില്വയെ വീഴ്ത്തി രവീന്ദ്ര ജഡേജയാണ് മത്സരത്തിലേക്ക് തിരികെ കൊണ്ടുവന്നത്. മഹീഷ തീക്ഷണയെ ഹാര്ദ്ദിക് പാണ്ഡ്യയുടെ പന്തില് സൂര്യകുമാര് യാദവ് പറന്നു പിടിച്ചപ്പോള് കസുന് രജിതയെയും മഹീഷ പതിരാനയെയും ഒരു ഓവറില് മടക്കി കുല്ദീപ് യാദവ് ലങ്കന് പോരാട്ടം അവസാനിപ്പിച്ചു.
ബൗളിംഗില് അഞ്ച് വിക്കറ്റുമായി ഭാരതത്തെ വട്ടം കറക്കിയ ദുനിത് വെല്ലാലെഗെ 46 പന്തില് 42 റണ്സുമായി പുറത്താകാതെ നിന്നു. കുല്ദീപ് 43 റണ്സിന് നാലു വിക്കറ്റെടുത്തപ്പോള് ബുമ്ര 30 റണ്സിനും ജ!ഡേജ 33 റണ്സിനും രണ്ട് വിക്കറ്റ് വീതം വീഴ്ത്തി.
ടോസ് നേടി ആദ്യം ബാറ്റ് ചെയ്ത ക്യാപ്റ്റന് രോഹിത് ശര്മയുടെ അര്ധസെഞ്ചുറിയുടെയും(53), ഇഷാന് കിഷന്(31), കെ എല് രാഹുല്(39) എന്നിവരുടെ ഭേദപ്പെട്ട പ്രകടനത്തിന്റെയും അടിസ്ഥാനത്തിലാണ് ഭാരതം ഭേദപ്പെട്ട സ്കോറിലെത്തിയത്. 186 റണ്സിന് ഓമ്പതാം വിക്കറ്റ് നഷ്ടമായ ഭാരതത്തിന് അവസാന വിക്കറ്റില് അക്സര് പട്ടേലും(26) മുഹമ്മദ് സിറാജും(5*) ചേര്ന്ന് 27 റണ്സ് കൂട്ടിച്ചേര്ത്തത് നിര്ണായകമായി.
ഫൈനല് തേടി വ്യാഴാഴ്ച ശ്രീലങ്കയും പാകിസ്താനും ഏറ്റുമുട്ടും. വെള്ളിയാഴ്ച ബംഗ്ലാദേശിനെതിരായാണ് ഭാരതത്തിന് സൂപ്പര് ഫോറിലെ അവസാന മത്സരം
