ബൈക്ക് യാത്രികനെ ആക്രമിച്ച് പല്ലിളക്കിയ സംഭവം; രണ്ടു പേർ അറസ്റ്റിൽ

ആലപ്പുഴ: ബൈക്ക് യാത്രികനെ ആക്രമിച്ച് പല്ലിളക്കിയ സംഭവത്തിൽ രണ്ട് പേർ അറസ്റ്റിൽ. ചേർത്തല സ്വദേശി ആഷിക്, സുജിത് എന്നിവരാണ് അറസ്റ്റിലായത്. കോടതിയിൽ ഹാജരാക്കിയ ഇരുവരെയും റിമാൻഡ് ചെയ്തു. കഴിഞ്ഞ ദിവസം രാത്രി എട്ട് മണിയോടെയായിരുന്നു സംഭവം. ചേർത്തല നെടുമ്പ്രക്കാടിന് സമീപത്താണ് ആക്രമണം നടന്നത്.

റോഡരികിൽ ബൈക്കുമായി നിൽക്കുകയായിരുന്ന ചേർത്തല സ്വദേശി ദിലീപിനെ ഇരുവരും ചേർന്ന് ആക്രമിക്കുകയായിരുന്നു. ആക്രമണത്തിൽ ഹെൽമറ്റ് കൊണ്ട് ഇടിച്ച് ദിലീപിന്റെ പല്ലിളകി. പിന്നാലെ കഴുത്തിൽ ഇട്ടിരുന്ന മാല പൊട്ടിച്ചതായും പോലീസ് പറയുന്നു. അന്വേഷണത്തിനൊടുവിൽ കോട്ടയം മെഡിക്കൽ കോളേജ് പരിസരത്ത് നിന്നുമാണ് പ്രതികളെ പിടികൂടിയത്. കേസിലെ ഒന്നാം പ്രതിയായ ആഷിക് വധശ്രമം ഉൾപ്പെടെ നിരവധി കേസുകളിൽ പ്രതിയാണെന്നും ഇയാൾക്കെതിരെ കാപ്പ ഉൾപ്പെടെയുള്ള തുടർനടപടികൾ സ്വീകരിക്കുന്നതാണെന്നും ചേർത്തല ഇൻസ്‌പെക്ടർ ബി.വിനോദ് കുമാർ അറിയിച്ചു.