എറണാകുളം: കൊച്ചിയിൽ വൻ മയക്കുമരുന്ന് വേട്ടയിൽ യുവാവ് അറസ്റ്റിൽ. എളമക്കര കറുകപ്പിള്ളി ഭാഗത്ത് നിന്നും എംഡിഎംഎയുമായി കാസർകോഡ് സ്വദേശി പിടിയിലാകുകയായിരുന്നു. ഇയാളിൽ നിന്നും 69.12 ഗ്രാം എംഡിഎംഎ പിടിച്ചെടുത്തു. സംഭവത്തിൽ ഉദുമ ബോറ ഫാത്തിമ മൻസിലിൽ അബ്ദുൽ സലാം ആണ് അറസ്റ്റിലായത്.
കൊച്ചി സിറ്റി പോലീസ് കമ്മീഷണർ എ അക്ബറിന് ലഭിച്ച രഹസ്യ വിവരത്തിന്റെ അടിസ്ഥാനത്തിലാണ് പ്രതി പിടിയിലാത്. കാറിൽ എളമക്കര കറുകപ്പള്ളി ഭാഗത്ത് മയക്കുമരുന്ന് വിൽപ്പനയുമായി ബന്ധപ്പെട്ട് എത്തിയപ്പോഴായിരുന്നു കൊച്ചി സിറ്റി യോദ്ധാവ് സ്ക്വാഡിന്റെയും എളമക്കര പോലീസിന്റെയും വലയിലാകുന്നത്.
ബെംഗളൂരുവിൽ നിന്ന് കേരളത്തിലേക്ക് മയക്കുമരുന്ന് എത്തിച്ച് ആവശ്യക്കാർക്ക് വിൽപ്പന നടത്തി വരുന്നതായിരുന്നു പ്രതിയുടെ രീതി. എളമക്കര സബ് ഇൻസ്പെക്ടർ അയിൻ ബാബു, എഎസ്ഐ ലാലു ജോസഫ്, എസ്സിപിഒമാരായ സുധീഷ്, അനീഷ്, സിപിഒ ശ്രീജിത്ത് എന്നിവരും അന്വേഷണ സംഘത്തിൽ ഉണ്ടായിരുന്നു.
