തിരുവനന്തപുരം: മുന് മുഖ്യമന്ത്രി ഉമ്മന്ചാണ്ടിയുടെ അച്ചു ഉമ്മനെതിരായ സൈബര് അധിക്ഷേപ കേസിലെ പ്രതി നന്ദകുമാര് കൊളത്താപ്പള്ളിയെ പൊലീസ് ചോദ്യം ചെയ്ത് വിട്ടയച്ചു. ആവശ്യമെങ്കില് വീണ്ടും വിളിച്ചുവരുത്തും. നന്ദകുമാറിന്റെ ഫോണ് പൊലീസ് കസ്റ്റഡിയിലെടുത്തു.
മാധ്യമങ്ങളോട് സംസാരിക്കാന് നന്ദകുമാര് തയാറായില്ല. ഹെല്മറ്റ് ധരിച്ചാണ് പൊലീസ് സ്റ്റേഷനില് നിന്ന് പുറത്തിറങ്ങിയത്. സെക്രട്ടേറിയറ്റിലെ മുന് അഡീഷണല് സെക്രട്ടറിയാണ് നന്ദകുമാര്.
സൈബര് ആക്രമണത്തിനെതിരെ പൊലീസിലും വനിതാ കമ്മീഷനിലും അച്ചു ഉമ്മന് പരാതി നല്കിയിരുന്നു.സ്ക്രീന് ഷോട്ടും ഹാജരാക്കിയിരുന്നു. തുടര്ന്ന് പൊലീസ് കേസെടുത്ത് മൊഴി രേഖപ്പെടുത്തിയിരുന്നു.
അച്ചു ഉമ്മന് പരാതി നല്കിയപ്പോള് നന്ദകുമാര് സാമൂഹ്യ മാധ്യമത്തില് ഖേദം പ്രകടിപ്പിച്ചിരുന്നു. സെക്രട്ടറിയേറ്റിലെ ഇടത് സംഘടനാ നേതാവായ നന്ദകുമാറിന് ഐ എച്ച് ആര് ഡിയില് പുനര്നിയമനം നല്കിയിരുന്നു.
