കൊച്ചി: എറണാകുളം പെരുമ്പാവൂരില് വീട്ടില്കയറി പെണ്കുട്ടിയെയും മുത്തശ്ശിയെയും മുത്തശ്ശനെയും വെട്ടിപരിക്കേല്പ്പിച്ച ശേഷം യുവാവ് ജീവനൊടുക്കി.
രായമംഗലം സ്വദേശി ഔസേപ്പ്, ഭാര്യ ചിന്നമ്മ, പേരക്കുട്ടി അല്ക്ക എന്ന അന്ന ബിനു (19)എന്നിവര്ക്കാണ് വെട്ടേറ്റത്. പരിക്കേറ്റ മൂന്ന് പേരെയും കളമശേരി മെഡിക്കല് കോളേജ് ആശുപത്രിയിലേക്ക് മാറ്റി. പെണ്കുട്ടിയുടെ നില ഗുരുതരമാണ്.
പ്രതി എല്ദോസിനെ പിന്നീട് ഇയാളുടെ ഇരിങ്ങോലിലെ വീട്ടില് തൂങ്ങിമരിച്ച നിലയില് കണ്ടെത്തി. ഇന്ന് ഉച്ചയോടെയാണ് സംഭവം.
ആക്രമണം തടയാന് ശ്രമിക്കുന്നതിനിടെയാണ് മുത്തശ്ശിക്കും മുത്തശ്ശനും വെട്ടേറ്റത്.
പെണ്കുട്ടിയെ ഇയാള് നിരന്തരമായി പിന്തുടര്ന്ന് ശല്യം ചെയ്തിരുന്നെന്ന് പൊലീസ് അറിയിച്ചു. പാലാരിവട്ടത്തെ സ്വകാര്യ സ്ഥാപനത്തില് വിദ്യാര്ത്ഥിയായ എല്ദോസും കോലഞ്ചേരിയില് നഴ്സിംഗ് വിദ്യാര്ത്ഥിനിയായ അല്ക്കയും തമ്മില് നേരത്തെ പരിചയമുണ്ടായിരുന്നതായാണ് അറിയുന്നത്. അടുത്തിടെ ഇവര് തമ്മില് അകന്നിരുന്നുവെന്നാണ് വിവരം.
