തിരുവനന്തപുരം: കേരള കോൺഗ്രസ് (ബി)യില് നിന്ന് മുന്നാക്ക ക്ഷേമ കോർപ്പറേഷൻ ചെയർമാൻ സ്ഥാനം സിപിഎം ഏറ്റെടുത്തു. അഡ്വക്കേറ്റ് എം. രാജഗോപാലൻ നായരെ ചെയര്മാനാക്കി ബോർഡ് പുന: സംഘടിപ്പിച്ചു. ഇതുസംബന്ധിച്ച ഉത്തരവ് പൊതുഭരണ വകുപ്പ് പുറത്തിറക്കി. കേരള കോൺഗ്രസ് (ബി) സംസ്ഥാന ജനറൽ സെക്രട്ടറി കെ.ജി. പ്രേംജിത്ത് ആയിരുന്നു ചെയർമാൻ സ്ഥാനം വഹിച്ചിരുന്നത്. അന്തരിച്ച കേരള കോണ്ഗ്രസ് (ബി) നേതാവ് ആർ. ബാലകൃഷ്ണപിള്ളയുടെ പിൻഗാമിയായാണ് പ്രേംജിത്ത് ചുമതലയേറ്റത്.
അതേസമയം, സിപിഎം തീരുമാനം ഏകപക്ഷീയമാണെന്നും ചെയര്മാന് സ്ഥാനം ഒഴിവാക്കിയ നടപടിയില് ഇടത് മുന്നണിയെ പ്രതിഷേധം അറിയിക്കുമെന്നും കേരള കോൺഗ്രസ് (ബി) നേതൃത്വം അറിയിച്ചു. പാര്ട്ടിക്ക് ചെയർമാൻ സ്ഥാനം നൽകിയത് മുന്നണിയിലെ ചർച്ചകളുടെ അടിസ്ഥാനത്തിലായിരുന്നു. സ്ഥാനം തിരിച്ചെടുത്തത് ഏകപക്ഷീയ തീരുമാനമാണെന്നും പ്രതിഷേധം മുന്നണി നേതൃത്വത്തെ അറിയിക്കുമെന്നും കേരള കോണ്ഗ്രസ് (ബി) നേതാക്കള് അറിയിച്ചു.
കേരള കോൺഗ്രസ് (ബി) ഇടതുമുന്നണിയിലെത്തിയപ്പോൾ ആർ ബാലകൃഷ്ണപിള്ളയ്ക്ക് കാബിനറ്റ് പദവിയുൾപ്പെടെ നൽകിയാണ് മുന്നാക്ക കോർപ്പറേഷൻ ചെയർമാനാക്കിയത്. രണ്ടാം പിണറായി സർക്കാർ രണ്ടര വർഷം തികയ്ക്കുമ്പോൾ കെ ബി ഗണേഷ് കുമാറിന് മന്ത്രിസ്ഥാനം നൽകുമെന്ന് വാഗ്ദാനമുണ്ടായിരുന്നു. ഈ ഉറപ്പ് പാലിക്കുമോ എന്ന കാര്യത്തിൽ തീരുമാനം ഉണ്ടാകാത്ത സാഹചര്യത്തിലാണ് ഉണ്ടായിരുന്ന പദവി കാലാവധി പകുതിയെത്തിയപ്പോൾ തിരിച്ചെടുത്തത്.
സിപിഎം അനുഭാവിയായ രാജഗോപാലൻ നായർ മുമ്പ് തിരുവിതാംകൂർ ദേവസ്വം ബോർഡ് പ്രസിഡന്റും ദേവസ്വം റിക്രൂട്മെന്റ് ബോർഡ് ചെയർമാനുമായിരുന്നു.
