കോട്ടയം: രാമപുരത്ത് മൂന്നു പെണ്മക്കളുടെ കഴുത്തറുത്ത ശേഷം പിതാവ് ആത്മഹത്യ ചെയ്തു. രാമപുരം ചേറ്റുകുളം സ്വദേശി പുലിക്കുന്നേല് ജോമോന് (40) ആണ് സ്കൂള് വിദ്യാര്ത്ഥിനികളായ മൂന്ന് പെണ്കുട്ടികളുടെ കഴുത്തറുത്ത ശേഷം തൂങ്ങിമരിച്ചത്. ഇന്നലെ അര്ദ്ധരാത്രി പന്ത്രണ്ടരയോടെ ആയിരുന്നു അതിദാരുണമായ സംഭവം. ഗുരുതരമായി പരിക്കേറ്റ പെണ്കുട്ടികളെ കോട്ടയം മെഡിക്കല് കോളേജ് ആശുപത്രിയില് പ്രവേശിപ്പിച്ചിരിക്കുകയാണ്.
അനന്യ (13), അമേയ (10), അനാമിക (7) എന്നിവരാണ് ചികിത്സയില് കഴിയുന്നത്. ഇതില് അനാമികയുടെ നില അതീവ ഗുരുതരമാണ്. ജോമോനെയും മക്കളെയും ഉപേക്ഷിച്ചു ഭാര്യ ഒന്നര വര്ഷം മുന്പേ പോയിരുന്നു. ഇതിന് ശേഷം ജോമോന്റെ കൂടെയാണ് മൂന്നു പെണ്മക്കളും താമസിച്ചിരുന്നത്. കുടുംബ പ്രശ്നമാണ് സംഭവത്തിന്റെ പിന്നിലെന്ന് കരുതപ്പെടുന്നു. പോലീസ് വിശദമായ അന്വേഷണം ആരംഭിച്ചു.
മുറിവേറ്റ പെണ്കുട്ടികളിലൊരാള് നിലവിളിച്ച് കൊണ്ട് ബന്ധുവീട്ടിലേക്ക് ഓടിയപ്പോഴാണ് സംഭവം പുറത്തറിയുന്നത്. ബന്ധുക്കളെത്തി കുട്ടികളെ മെഡിക്കല് കോളേജിലേക്ക് മാറ്റി. എന്നാല് ജോമോനെ ഇവര് കണ്ടിരുന്നില്ല. വിവരമറിഞ്ഞ് സ്ഥലത്തെത്തിയ രാമപുരം പോലീസ് വീട്ടില് പരിശോധന നടത്തിയപ്പോഴാണ് മുറിയ്ക്കകത്ത് ജോമോനെ തൂങ്ങിമരിച്ച നിലയില് കണ്ടെത്തിയത്. മൃതദേഹം ഇന്ക്വസ്റ്റ് നടപടികള്ക്ക് ശേഷം പോസ്റ്റ്മോര്ട്ടത്തിനായി മാറ്റി.
