ഹരാരെ: സിംബാബ്വെ ക്രിക്കറ്റ് ഇതിഹാസം ഹീത്ത് സ്ട്രീക്ക് (49) അന്തരിച്ചു. ഭാര്യ നാദിന് സ്ട്രീക്കാണ് സാമൂഹിക മാധ്യമങ്ങളിലൂടെ മരണ വിവരം അറിയിച്ചത്. വന്കുടലിലെയും കരളിലെയും അര്ബുദ ബാധയെ തുടര്ന്ന് ചികിത്സയിലിരിക്കെയാണ് അന്ത്യം. കഴിഞ്ഞ മേയ് മാസം മുതല് ആശുപത്രിയിലായിരുന്നു അദ്ദേഹം.
സിംബാബ്വെ ദേശീയ ടീമിന്റെ നായകനായിരുന്നു. 1990കളിലും 2000ന്റെ തുടക്കത്തിലും സിംബാബ്വെയില് ഏറ്റവും ആഘോഷിക്കപ്പെട്ട കായിക താരമാണ് സ്ട്രീക്ക്. ടെസ്റ്റില് 100 വിക്കറ്റില് അധികം നേടിയ ഒരേയൊരു സിംബാബ്വെ ബൗളറും ടെസ്റ്റില് 100 വിക്കറ്റിനൊപ്പം 1000 റണ്സും നേടുന്ന ആദ്യ താരവും ഹീത്ത് സ്ട്രീക്ക് തന്നെ. നൂറ് വിക്കറ്റ് നേടിയ നാല് സിംബാബ്വെ ബൗളര്മാരില് ഒരാളായ സ്ട്രീക്ക് ഏകദിനത്തില് 200 വിക്കറ്റും 2000 റൺസും നേടിയിട്ടുണ്ട്.
സിംബാബ്വെ ക്രിക്കറ്റിന്റെ സുവര്ണകാലത്ത് ടീമിന്റെ നെടുംതൂണായിരുന്ന അദ്ദേഹം 2005ലാണ് രാജ്യാന്തര ക്രിക്കറ്റില്നിന്ന് വിരമിച്ചത്. സിംബാബ്വെയ്ക്കായി 65 ടെസ്റ്റ് മത്സരങ്ങളും 189 ഏകദിനങ്ങളും കളിച്ചു. 4933 റണ്സും 455 വിക്കറ്റുകളും സ്വന്തമാക്കി. രാജ്യാന്തര ക്രിക്കറ്റില് സിംബാബ്വെയ്ക്കായി കൂടുതല് വിക്കറ്റ് നേടിയതിന്റെ റിക്കാര്ഡ് സ്ട്രീക്കിന്റെ പേരിലാണ്.
വിരമിച്ചതിനു ശേഷം പരിശീലകനായി തുടര്ന്നു. ആഭ്യന്തര, രാജ്യാന്തര തലങ്ങളിലായി ഒട്ടേറെ ടീമുകളെ പരിശീലിപ്പിച്ചിട്ടുണ്ട്. ഐപിഎലില് കൊല്ക്കത്ത നൈറ്റ് റൈഡേഴ്സിന്റെ പരിശീലകനായിരുന്നു. ബംഗ്ലാദേശ്, സിംബാബ്വെ ടീമുകളെയും പരിശീലിപ്പിച്ചു. അര്ബുദ ബാധിതനായ ഹീത്ത് സ്ട്രീക്ക് മരണത്തിന് കീഴടങ്ങിയതായി നേരത്തേ വ്യാജ വാര്ത്തകള് പ്രചരിച്ചിരുന്നു. എന്നാല് ഇത് സത്യമല്ലെന്ന് പിന്നീട് സ്ഥിരീകരിച്ചു.
