ആലപ്പുഴ: നെല്കര്ഷകരുടെ വിഷയത്തില് കേന്ദ്രസര്ക്കാരിനെ പിന്തുണച്ച് കെ പി സി സി അധ്യക്ഷന് കെ സുധാകരന്. കര്ഷകരുടെ പരാതിയില് രാഷ്ട്രീയമുണ്ടെന്ന് പറഞ്ഞ് രക്ഷപ്പെടാനാണ് സംസ്ഥാന സര്ക്കാര് ശ്രമിക്കുന്നത്.
കേന്ദ്രസര്ക്കാര് പണം കൊടുക്കാനുണ്ടെന്ന വാദം കള്ളമാണ്. നെല്ല് സംഭരണത്തിന്റെ നടപടികളെല്ലാം പൂര്ത്തിയാക്കിയ ശേഷമാണ് കേന്ദ്രസര്ക്കാര് പണം നല്കുന്നത്. നെല്വില വിഷയത്തില് കേന്ദ്രസര്ക്കാരിന്റെ ഭാഗത്ത് നിന്നും തെറ്റൊന്നും ഉണ്ടായിട്ടില്ല. ഇക്കാര്യത്തില് കേന്ദ്രത്തെ കുറ്റപ്പെടുത്തേണ്ടതില്ല. കണക്കു കൊടുത്തതിന്റെ പണം കേന്ദ്രം നല്കി. ഇനിയുള്ള നെല്ലിന്റെ കണക്ക് കൊടുത്താല് അടുത്ത ഫണ്ട് കേന്ദ്രസര്ക്കാര് അനുവദിക്കും.
കര്ഷകരുടെ അവസ്ഥ ദുഃഖകരമാണ്. സര്ക്കാര് ചെയ്യുന്ന വലിയ അനീതിയാണിത്. നടന് ജയസൂര്യ പറഞ്ഞത് വസ്തുനിഷ്ഠമായ കാര്യമാണ്. അതില് രാഷ്ട്രീയമുണ്ടെന്ന് കരുതുന്നില്ല. കുട്ടനാട്ടില് നെല് കര്ഷകരുമായി ആശയവിനിമയം നടത്തിയ ശേഷം മാധ്യമങ്ങളോട് പ്രതികരിക്കുകയായിരുന്നു കെ സുധാകരന്.
