അതിര്‍ത്തി ചെക്ക് പോസ്റ്റുകളില്‍ വിജിലന്‍സിന്റെ മിന്നല്‍ പരിശോധന;വ്യാപക ക്രമക്കേട് കണ്ടെത്തി

തിരുവനന്തപുരം: സംസ്ഥാനത്തെ അതിര്‍ത്തി ചെക്ക് പോസ്റ്റുകളില്‍ വിജിലന്‍സ് നടത്തിയ മിന്നല്‍ പരിശോധനയില്‍ വ്യാപക ക്രമക്കേട് കണ്ടെത്തി. ഓണക്കാലത്തോടനുബന്ധിച്ച് ഒമ്പത് അതിര്‍ത്തി ചെക്ക് പോസ്റ്റുകളിലും എക്‌സൈസ് വകുപ്പിന്റെ 39 അതിര്‍ത്തി ചെക്ക് പോസ്റ്റുകളിലും മൃഗസംരക്ഷണ വകുപ്പിന്റെ 19 കന്നുകാലി ചെക്ക് പോസ്റ്റിലും മോട്ടോര്‍ വാഹന വകുപ്പിന്റെ 12 ചെക്ക് പോസ്റ്റുകളിലുമാണ് പരിശോധന നടത്തിയത്.

‘ഓപ്പറേഷന്‍ ട്രഷര്‍ ഹണ്ട്’ എന്ന പേരില്‍ ഞായറാഴ്ച പുലര്‍ച്ചെ 5.30നാണ് പരിശോധന തുടങ്ങിയത്. ഓണക്കാലത്ത് പരിശോധനയില്ലാതെ കൈക്കൂലി വാങ്ങി വാഹനങ്ങള്‍ കടത്തിവിടുന്നു എന്ന വിവരത്തിന്റെ അടിസ്ഥാനത്തിലാണ് പരിശോധന. പാറശാല ആര്‍ടിഒ ചെക്ക് പോസ്റ്റില്‍ നിന്നും 11,900 രൂപ പിടിച്ചെടുത്തു.

ചെക്‌പോസ്റ്റിന് സമീപത്തെ ടയര്‍ കടയില്‍ സൂക്ഷിച്ച പണമാണ് വിജിലന്‍സ് പിടിച്ചത്. പണം ടയറിനടിയില്‍ ഒളിപ്പിച്ച നിലയിലായിരുന്നു. വാളയാര്‍ അതിര്‍ത്തി ചെക്ക് പോസ്റ്റില്‍ മതിയായ പരിശോധനകള്‍ ഇല്ലാതെ വാഹനങ്ങള്‍ കടത്തി വിട്ടതിന് 85,000 രൂപ പിഴയിടാക്കി.വേലന്താവളം ചെക്ക് പോസ്റ്റില്‍ നിന്ന് നാലായിരം രൂപ പിടിച്ചെടുത്തു.