കാവാലം:കുട്ടനാട് കാവാലം ലിസ്യുവിന് സമീപം ബോട്ടില്‍ നിന്നും കാല്‍വഴുതി ആറ്റില്‍ വീണ യുവാവിനെ കാണാതായി. ചങ്ങനാകശേരി തുരുത്തി സ്വദേശി സനീഷിനെ (41) യാണ് കാണാതായത്. ഇന്ന് വൈകുന്നേരം നാലരയോടെ ആറായിരം കായലിനു സമീപത്താണ് സംഭവം നടന്നത്.
ഇന്ന് രാവിലെ 11.30 ഓടെ കാവാലം ജങ്കാര്‍ കടവിനു സമീപത്തുനിന്നുമാണ് ഏഴംഗ സംഘം മോട്ടോര്‍ ബോട്ടില്‍ കായലില്‍ വിനോദയാത്രയ്‌ക്കു പോയത്. തിരികെ വരുന്നതിനിടെ സംഭവസ്ഥലത്തെത്തിയപ്പോള്‍ സനീഷ് കാല്‍വഴുതി ആറ്റിലേക്കു വീഴുകയായിരുന്നു. വീഴുന്നതിനിടെ രക്ഷപെടുന്നതിനായി ഒപ്പമുണ്ടായിരുന്നവരെ കയറിപ്പിടിച്ചതിനെ തുടര്‍ന്ന് രണ്ടു സുഹൃത്തുകളും വെള്ളത്തില്‍ വീണു.
മൂവരും ആറ്റിലേക്കു വീഴുന്നതു കണ്ട് സമീപത്തെ താമസക്കാര്‍ വള്ളത്തിലെത്തി ഇവരില്‍ രണ്ടുപേരെ രക്ഷപെടുത്തി. എന്നാല്‍ സനീഷിനെ ഇതിനോടകം കണാതാകുകയായിരുന്നു. വിവരമറിഞ്ഞു സ്ഥലത്തെത്തിയ കൈനടി പോലീസും, ചങ്ങനാശേരി ഫയര്‍ഫോഴ്‌സും ഏഴരവരെ തിരച്ചില്‍ നടത്തിയെങ്കിലും ഫലമുണ്ടായില്ല. നാളെ രാവിലെ മുതല്‍ വീണ്ടും തിരച്ചില്‍ ആരംഭിക്കുമെന്ന് അധികൃതര്‍ അറിയിച്ചു.
പ്രതികരിക്കാൻ ഇവിടെ എഴുതുക: