ആകാശച്ചെരുവില്‍ റോഡുമായി വനിതാ സൈനികര്‍

ലഡാക്ക്: ലോകത്തിലെ ഗതാഗതയോഗ്യമായ ഏറ്റവും ഉയരം കൂടിയ റോഡ് നിര്‍മാണത്തിന് ലഡാക്കില്‍ തുടക്കമായി. ലികാരു-മിഗ് ലാ-ഫുക് ചെ മേഖലയിലാണ് ബോര്‍ഡര്‍ റോഡ് ഓര്‍ഗനൈസേഷന്റെ വനിതാ വിഭാഗം ആള്‍ വിമന്‍ റോഡ് കണ്‍സ്ട്രക്ഷന്‍ കമ്പനിയുടെ നേതൃത്വത്തില്‍ റോഡ് നിര്‍മിക്കുന്നത്. കേണല്‍ പൊനുങ് ഡൊമിങ് നയിക്കുന്ന അഞ്ചംഗ വിമന്‍ ബോര്‍ഡര്‍ റോഡ് ടാസ്‌ക് ഫോഴ്സാണ് ഇത് നിയന്ത്രിക്കുന്നത്.
രാജ്യത്തിന്റെ 77-ാം സ്വാതന്ത്ര്യദിനത്തിലാണ് ലഡാക്കിലെ ഡെംചോക്ക് സെക്ടറില്‍ റോഡിന്റെ നിര്‍മാണോദ്ഘാടനം ബിആര്‍ഒ ഡയറക്ടര്‍ ജനറല്‍ ലെഫ്റ്റനന്റ് ജനറല്‍ രാജീവ് ചൗധരി നിര്‍വഹിച്ചത്. 19,400 അടി ഉയരത്തില്‍ 64 കിലോമീറ്റര്‍ നീളത്തിലുള്ള തന്ത്രപ്രധാനമായ റോഡ് രണ്ട് ഘട്ടങ്ങളായി പൂര്‍ത്തിയാക്കും.
സൈന്യത്തിന് ഏറ്റവും നിര്‍ണായകമായ ഫുക് ചെയില്‍ ദൂരെയുള്ള ആര്‍മി ഔട്ട്‌പോസ്റ്റുകളിലേക്ക് എത്തിച്ചേരുന്നതിന് ഈ പാത ഉപകരിക്കും. ലികാരു മുതല്‍ ഫുക്ചെ വരെയാണ് റോഡിന്റെ ദൂരം.
യഥാര്‍ത്ഥ നിയന്ത്രണ രേഖയില്‍ നിന്ന് (എല്‍എസി) വെറും മൂന്ന് കിലോമീറ്റര്‍ അകലെയാണ് റോഡ് എന്നതിനാല്‍ അതീവ സുരക്ഷാമേഖല കൂടിയാണിത്. നേരത്തെ തങ്ങള്‍ തന്നെ നിര്‍മിച്ച ഉംലിംഗ് ലാ പാസിനെ മറികടക്കുന്ന ഉയരമാകും പുതിയ റോഡിനെന്ന് ബിആര്‍ഒ എക്സില്‍ അറിയിച്ചു. 2021ല്‍ നിര്‍മിച്ച 52 കിലോമീറ്റര്‍ ദൈര്‍ഘ്യമുള്ള ഉംലിങ് ലാ പാസ് 19,200 അടി ഉയരത്തിലാണ് സ്ഥിതി ചെയ്യുന്നത്.
ബൊളീവിയയിലെ ഉടുരുന്‍കു വൊള്‍കാനോയില്‍ സ്ഥിതി ചെയ്യുന്ന 18,953 അടി ഉയരമുള്ള പാതയുടെ ഗിന്നസ് റിക്കാര്‍ഡാണ് ഉംലിങ് ലാ പാസ് തകര്‍ത്തത്. പുതിയ പാത പൂര്‍ത്തിയാകുന്നതോടെ ഈ റിക്കാര്‍ഡും പഴങ്കഥയാകും.