കോട്ടയം: പുതുപ്പള്ളി നിയോജകമണ്ഡലം ഉപതെരഞ്ഞെടുപ്പിനോടനുബന്ധിച്ച് പ്രചാരണങ്ങളില് മാതൃക പെരുമാറ്റച്ചട്ടം പാലിച്ചാണോയെന്നു പരിശോധിക്കുന്നതിനായി ആന്റീ ഡീഫേസ്മെന്റ് സ്ക്വാഡുകളുടെ പരിശോധന തുടങ്ങി.
നിലവില് നാലു സ്ക്വാഡുകളെയാണ് നിയോഗിച്ചിട്ടുള്ളത്. നാലു സ്ക്വാഡുകളിലായി 12 പേരാണ് പ്രവര്ത്തിക്കുന്നത്. ആഗസ്ത് 16 മുതല് എട്ടു സ്ക്വാഡുകളെ നിയോഗിക്കും. നോട്ടീസുകള്, ബാനറുകള്, ബോര്ഡുകള്, പോസ്റ്ററുകള്, ചുവരെഴുത്തുകള്, മൈക്ക് അനൗണ്സ്മെന്റുകള്, പൊതുയോഗങ്ങള് മാതൃകാപെരുമാറ്റച്ചട്ടം പാലിച്ചാണോ സ്ഥാപിച്ചതെന്നും സംഘടിപ്പിക്കുന്നതെന്നും സ്ക്വാഡ് പരിശോധിക്കും.
പൊതുസ്ഥലങ്ങളില് പ്രചാരണ പോസ്റ്ററുകളും ബാനറുകളും ബോര്ഡുകളും സ്ഥാപിക്കുന്നത് തെരഞ്ഞെടുപ്പ് ചട്ടങ്ങളുടെ ലംഘനമാണ്. മാതൃകാ പെരുമാറ്റചട്ടത്തിന് വിരുദ്ധമായി പൊതുസ്ഥലങ്ങളിലും സര്ക്കാര് സ്ഥാപനങ്ങളിലും സ്ഥലമുടമയുടെ അനുമതിയില്ലാതെ സ്വകാര്യ ഇടങ്ങളിലും സ്ഥാപിച്ചിട്ടുള്ള രാഷ്ട്രീയസ്വഭാവമുള്ള പ്രചാരണ സാമഗ്രികള് സ്ക്വാഡുകള് നീക്കും. ചെലവ് ബന്ധപ്പെട്ടവരില് നിന്ന് ഈടാക്കുന്നതിന് നടപടി സ്വീകരിക്കും. അഡീഷണല് ജില്ലാ മജിസ്ട്രേറ്റാണ് ആന്റീ ഡീഫേസ്മെന്റ് പ്രവര്ത്തനങ്ങള് ഏകോപിപ്പിക്കുന്നത്.
