ലഖ്‌നൗ: ഐഐടി റൂര്‍ക്കിയിലെയും ജിയോളജിക്കല്‍ സര്‍വേ ഓഫ് ഇന്ത്യയിലെയും (ജിഎസ്‌ഐ) ശാസ്ത്രജ്ഞര്‍ ജയ്‌സാല്‍മിറില്‍ നിന്ന് നീളമുള്ള കഴുത്തുള്ള, സസ്യഭുക്കായ ഡിക്രെയോസോറിഡ് ദിനോസറിന്റെ ഏറ്റവും പഴക്കം ചെന്ന ഫോസില്‍ അവശിഷ്ടങ്ങള്‍ കണ്ടെത്തി. ഇത് ഇന്ത്യ ദിനോസര്‍ പരിണാമത്തിന്റെ പ്രധാന കേന്ദ്രമായിരുന്നുവെന്ന് സൂചന നല്‍ക്കുന്നുവെന്നും റിപ്പോര്‍ട്ട് വ്യക്തമാക്കുന്നു.
അന്താരാഷ്‌ട്ര ജേണലായ ‘സയന്റിഫിക് റിപ്പോര്‍ട്ടുകള്‍’ പ്രസിദ്ധീകരിച്ച പഠന പ്രകാരം, അവശിഷ്ടങ്ങള്‍ 167 ദശലക്ഷം വര്‍ഷം പഴക്കമുള്ളതാണെന്നും ഇതുവരെ ശാസ്ത്രജ്ഞര്‍ക്ക് അജ്ഞാതമായ ഒരു പുതിയ ഇനത്തില്‍ പെട്ടതാണെന്നും വെളിപ്പെടുത്തുന്നു. ഇതിന് ‘തരോസോറസ് ഇന്‍ഡിക്കസ്’ എന്ന് പേരിട്ടു. ജീവിയുടെ ഫോസിലുകള്‍ കണ്ടെത്തിയ താര്‍ മരുഭൂമിയുടെ പരാമര്‍ശമാണ് പേരിന്റെ ആദ്യ ഭാഗത്തുള്ളത്. രണ്ടാം ഭാഗത്ത് ഉത്ഭവ രാജ്യത്തെയും സൂചിപ്പിക്കുന്നു.
ശാസ്ത്രജ്ഞരുടെ അഭിപ്രായത്തില്‍, ഡിക്രയോസോറിഡ് ദിനോസറുകളുടെ ഫോസിലുകള്‍ മുമ്പ് വടക്കന്‍, തെക്കേ അമേരിക്ക, ആഫ്രിക്ക, ചൈന എന്നിവിടങ്ങളില്‍ നിന്ന് കണ്ടെത്തിയിരുന്നു, എന്നാല്‍ അത്തരം ഫോസിലുകള്‍ ഇന്ത്യയില്‍ നിന്ന് ലഭിച്ചിരുന്നില്ല. എന്നാല്‍ രാജസ്ഥാനിലെ ജയ്‌സാല്‍മീര്‍ മേഖലയിലെ മിഡില്‍ ജുറാസിക് പാറകളില്‍ 2018ല്‍ ജിഎസ്‌ഐ ആരംഭിച്ച ഫോസില്‍ പര്യവേക്ഷണവും ഉത്ഖനനവും ഈ കണ്ടെത്തലിലേക്ക് നയിച്ചുവെന്ന് റൂര്‍ക്കി ഐഐടിയിലെ എര്‍ത്ത് സയന്‍സസ് വിഭാഗത്തിലെ വെര്‍ട്ടെബ്രേറ്റ് പാലിയന്റോളജി ചെയര്‍ പ്രൊഫസര്‍ സുനില്‍ ബാജ്‌പേയ് പറഞ്ഞു.
അദേഹം തന്റെ സഹപ്രവര്‍ത്തകനായ ദേശീയ പോസ്റ്റ്‌ഡോക്ടറല്‍ ഫെലോവായ ദേബജിത് ദത്തയ്‌ക്കൊപ്പം ചേര്‍ന്ന് ഏകദേശം അഞ്ച് വര്‍ഷത്തോളം ഫോസിലുകളെ കുറിച്ച് വിശദമായ പഠനം നടത്തി. ഫോസിലുകള്‍ കണ്ടെത്തിയ പാറകള്‍ക്ക് ഏകദേശം 167 ദശലക്ഷം വര്‍ഷങ്ങള്‍ പഴക്കമുണ്ട്, ഇത് ഈ പുതിയ ഇന്ത്യന്‍ സൗറോപോഡിനെ അറിയപ്പെടുന്ന ഏറ്റവും പഴക്കം ചെന്ന ഡിക്രെയോസോറിഡ് മാത്രമല്ല, ആഗോളതലത്തില്‍ ഏറ്റവും പഴക്കം ചെന്ന ഡിപ്ലോഡോകോയിഡ് ആണ് ഇത്. ഇതുവരെ ഏറ്റവും പഴയ ഡിക്രെയോസോറിഡ് ചൈനയില്‍ നിന്നുള്ളതായിരുന്നുവെന്നും (ഏകദേശം 166-164 ദശലക്ഷം വര്‍ഷം പഴക്കമുള്ളത്) റിപ്പോര്‍ട്ടില്‍ പറയുന്നു.
