പാലക്കാട്: നടി മാളവികയുടെ വീട്ടില് മോഷണം നടത്തിയ പ്രതിക്കായി അന്വേഷണം മുന്നോട്ട്. മോഷ്ടാവിന്റെ സി സി ടി വി ദൃശ്യങ്ങള് പുറത്തുവന്നിട്ടുണ്ട്.
ഈ ദൃശ്യങ്ങള് കേന്ദ്രീകരിച്ചാണ് പൊലീസ് അന്വേഷണം പുരോഗമിക്കുന്നത്. റെയിന് കോട്ടും തൊപ്പിയും ധരിച്ച് മുഖം മറച്ച മോഷ്ടാവ് വീട്ടിനരികിലൂടെ നടക്കുന്ന ദൃശ്യങ്ങളാണ് പുറത്ത് വന്നത്. നടിയുടെ വീട്ടില് വിരലടയാള വിദഗ്ദരടക്കം പരിശോധന നടത്തി.
നര്ത്തകിയും നടിയുമായ ഞാങ്ങാട്ടിരി അച്ചുതം വീട്ടില് മാളവികയുടെ വീടിന്റെ മുന്വാതില് കുത്തിത്തുറന്നാണ് കഴിഞ്ഞ രാത്രി മോഷണം നടത്തിയത്. ഇതിന്റെ ദൃശ്യങ്ങള് മാളവികയുടെ ഭര്ത്താവും നടനുമായ തേജസാണ് സാമൂഹ്യ മാധ്യമത്തില് പങ്കുവച്ചത്. ഒന്നര ലക്ഷത്തിലേറെ വിലവരുന്ന വാച്ചും മറ്റ് വിലപിടിപ്പുള്ള സാധനങ്ങളും ആണ് മോഷ്ടിക്കപ്പെട്ടത്.
മാളവികയും കുടുംബവും വീട്ടിലില്ലാതിരുന്ന സമയത്താണ് മോഷണം നടന്നത്. രാവിലെ ജോലിക്കാരി എത്തി വീട് തുറന്നപ്പോഴാണ് മോഷണ വിവരം അറിയുന്നത്. വീടിനുളളിലെ സാധനങ്ങള് വലിച്ചുവാരി ഇട്ട നിലയിലാണ്.
