ചെങ്ങന്നൂര്‍: ജീവനക്കാരിയെ പറ്റിച്ച് കടയിലെ കളക്ഷന്‍ തുക മുഴുവനും അപരിചിതന്‍ തട്ടിയെടുത്തതായി പരാതി. ജില്ലാആശുപത്രി ജംഗ്ഷനു സമീപമുള്ള സൂപ്പര്‍മാര്‍ക്കറ്റിനോട് ചേര്‍ന്നു പ്രവര്‍ത്തിക്കുന്ന ഡ്രൈ ക്ലീനിംഗ് ഷോപ്പിലാണ് സംഭവം. ഇവിടെ നിന്നും ഉടമസ്ഥന്റെ പരിചയക്കാരന്‍ ആണെന്ന് തെറ്റിദ്ധരിപ്പിച്ചാണ് പണവുമായി അപരിചിതന്‍ മുങ്ങിയത്.
കഴിഞ്ഞ ദിവസം വൈകിട്ട് കട അടയ്‌ക്കുമ്പോഴായിരുന്നു സംഭവം. ഈ സമയം കടയില്‍ ജീവനക്കാരി മാത്രമേ ഉണ്ടായിരുന്നുള്ളു. കടയില്‍ ചെന്ന അപരിചിതന്‍ ഉടനെ സ്ഥാപനത്തിന്റെ പാര്‍ട്ട്ണര്‍മാരില്‍ ഒരാളായ ബിജുവിനെ അന്വേഷിച്ചു. ബിജു ഇല്ലെന്ന് മനസ്സിലാക്കി ഫോണില്‍ ബിജുവിനെ വിളിക്കുന്ന രീതിയില്‍ നാടകം അഭിനയിച്ചു. നാളെ ജേക്കബ് എന്ന ഒരാള്‍ 5000 രൂപയുടെ ചെക്ക് കൊണ്ട് തരും. അത് വാങ്ങി മുതലാളിക്ക് കൊടുക്കണം എന്ന് ഇയാള്‍ ജീവനക്കാരിയോട് പറഞ്ഞു. ഇന്നത്തെ കളക്ഷന്‍ തന്നെ ഏല്‍പ്പിക്കാന്‍ ബിജു പറഞ്ഞെന്നും തട്ടിപ്പുകാരന്‍ പറഞ്ഞു. തട്ടിപ്പ് മനസ്സിലാകാതെ ജീവനക്കാരി അന്നേ ദിവസത്തെ മുഴുവന്‍ കളക്ഷന്‍ തുകയും അയാളെ ഏല്‍പ്പിച്ചു. പിറ്റേന്ന് കടയില്‍ ബിജു വന്നപ്പോഴാണ് ജീവനക്കാരി വിവരം പറയുന്നത്. തട്ടിപ്പാണെന്ന് ബോധ്യപ്പെട്ടതോടെ കടയിലെ സിസി ടിവി ദൃശ്യങ്ങള്‍ ഉള്‍പ്പെടെ ഉടമ ചെങ്ങന്നൂര്‍ പോലീസില്‍ പരാതി നല്‍കി.
പ്രതികരിക്കാൻ ഇവിടെ എഴുതുക: