തിരുവനന്തപുരം : സോളാര് കേസില് ഉമ്മന് ചാണ്ടിയെ ഇരയായി തങ്ങള് കണ്ടിട്ടില്ല. തങ്ങള് രാഷ്ട്രീയ എതിരാളികള്ക്കെതിരെ ഒരു നടപടിയും സ്വീകരിച്ചിട്ടില്ല. തങ്ങള് അദ്ദേഹത്തിനെതിരെ ഒരു പരാതിയും ഉന്നയിച്ചിട്ടില്ലെന്ന് ഇ.പി. ജയരാജന്. മാധ്യമ പ്രവര്ത്തകരോട് സംസാരിക്കുകയായിരുന്നു അദ്ദേഹം.
ഉമ്മന്ചാണ്ടിക്കെതിരെ തങ്ങള് ഒരു കേസും കൊടുത്തിട്ടില്ല. ഇങ്ങോട്ട് വന്ന പരാതികളില് നടത്തിയ അന്വേഷണത്തിലാണ് കേസുണ്ടായത്. സര്ക്കാരെന്ന നിലയില് അതാണ് ചെയ്യേണ്ടത്. ഉമ്മന് ചാണ്ടിയാണെങ്കിലും ഇതാണ് ചെയ്യുക. രാഷ്ട്രീയ വിരോധം തീര്ക്കാന് നിയമവ്യവസ്ഥയെയും കോടതിയേയും ഉപയോഗിക്കാന് പാടില്ല.
പ്രശ്നത്തെ നോക്കിയാണ് നിലപാട് സ്വീകരിക്കുന്നത്. രാഹുല് ഗാന്ധിക്കെതിരെ വന്ന നടപടിയില് കോണ്ഗ്രസ് എതിര്ക്കുന്നതിലും ശക്തമായി ഇടതുപക്ഷം എതിര്ത്തു. ഇക്കാര്യങ്ങള് തെറ്റാണെന്ന് പറഞ്ഞ് ശക്തമായി നിന്ന പാര്ട്ടിയാണ് തങ്ങളുടേത്. ‘ഉമ്മന്ചാണ്ടി അനുസ്മരണത്തില് മുഖ്യമന്ത്രി പിണറായി വിജയന് പങ്കെടുത്തതില് അഭിമാനംകൊള്ളുന്നു. ആ രാഷട്രീയം കോണ്ഗ്രസിന് ഇല്ലാതെ പോയല്ലോ. എല്ലാവര്ക്കും ഇല്ലാതെ പോയല്ലോ.
മരിച്ചാലുണ്ടാകുന്ന വികാരം കാണുന്നവരല്ലേ നമ്മള്. അങ്ങിനെയുള്ള വികാരങ്ങളില് എല്ലാവരും ഒന്നിച്ചു നില്ക്കുന്നതല്ലേ മനുഷ്യസംസ്കാരം. ആ രീതികളില് വ്യത്യസ്തമായ നിരീക്ഷണം ആര്ക്കെങ്കിലും ഉണ്ടെങ്കില് അത് തെറ്റായ രാഷ്ട്രീയത്തിന്റെയും അവര് വിശ്വസിക്കുന്ന പ്രത്യയശാസ്ത്രത്തിന്റെ അപജയത്തിന്റെയും ഭാഗമാണെന്നും ഇ.പി. ജയരാജന് കൂട്ടിച്ചേര്ത്തു.
