ഇടുക്കി: പണമിടപാടുമായി ബന്ധപ്പെട്ട തര്ക്കത്തേതുടര്ന്ന് യുവാവിന്റെ കൈപ്പത്തി വെട്ടിമാറ്റി. അടിമാലി സ്വദേശി വിജയരാജിന്റെ കൈപ്പത്തിയാണ് വെട്ടിമാറ്റിയത്. ആശുപത്രിയിലെത്തിച്ച് ഇയാളുടെ കൈപ്പത്തി തുന്നിച്ചേര്ത്തിട്ടുണ്ട്. നിലവില് അപകടനില തരണം ചെയ്തതായാണ് വിവരം.
സംഭവത്തില് പൊളിഞ്ഞപാലം സ്വദേശിയും തടി വ്യാപാരിയുമായ ബിനു, അടിമാലി പൊലീസ് സ്റ്റേഷനിൽ കീഴടങ്ങി. ഇയാളെ പോലീസ് കസ്റ്റഡിയിലെടുത്തു. തടിക്കച്ചവടവുമായി ബന്ധപ്പെട്ട ചില സാമ്പത്തിക ഇടപാടുകളില് ഇരുവര്ക്കുമിടെ തര്ക്കമുണ്ടാവുകയായിരുന്നു. ഞായറാഴ്ച വൈകിട്ട് വിജയരാജ് സഞ്ചിച്ചിരുന്ന വാഹനം ബിനു തടഞ്ഞുനിര്ത്തിയശേഷം ആക്രമിക്കുകയായിരുന്നു. പുറത്തിറങ്ങിയ ഉടനെ തന്നെ കൈപ്പത്തി വെട്ടിമാറ്റി.
വിജയരാജിന് ഒപ്പമുണ്ടായിരുന്ന സഹോദരി പുത്രനായ അഖില് ഉടനെ അടിമാലി താലൂക്ക് ആശുപത്രിയില് എത്തിച്ചു. പ്രാഥമിക ചികിത്സ നല്കിയ ശേഷം ഇയാളെ പിന്നീട് ആലുവയിലെ സ്വകാര്യ ആശുപത്രിയിലേക്ക് മാറ്റി. അടിയന്തിര ശസ്ത്രക്രിയക്ക് വിധേയനാക്കി, കൈപ്പത്തി തുന്നിച്ചേർത്തു. വിജയരാജ് അപകടനില തരണം ചെയ്തുവെന്നാണ് ആശുപത്രിയിൽ നിന്ന് ലഭിക്കുന്ന വിവരം.
വിജയരാജൻ ഫർണിച്ചർ കച്ചവടവും ബിനു തടിക്കച്ചവടവും നടത്തി വരികയായിരുന്നു.
