കൊച്ചി: ദേശീയ തല റോസ്ഗാര്‍ മേളയുടെ ഭാഗമായി കൊച്ചിയില്‍ കേന്ദ്ര പരോക്ഷ നികുതി ബോര്‍ഡിന്റ്റെ ആഭിമുഖ്യത്തില്‍ നാളെ (ജൂലൈ 22, 2023) രാവിലെ എറണാകുളത്ത് റോസഗാര്‍ മേള സംഘടിപ്പിക്കുന്നു. രാവിലെ ഒമ്പതുമണി മുതല്‍ എറണാകുളം ടി ഡി എം ഹാളിലാണ് പരിപാടി. കേന്ദ്ര സാമൂഹ്യ നീതി, ശാക്തീകരണ സഹമന്ത്രി രാംദാസ് അഠാവ്‌ലെ അധ്യക്ഷത വഹിക്കും. 119 ഉദ്യോഗാര്‍ത്ഥികള്‍ക്ക് നിയമന ഉത്തരവുകള്‍ സ്വീകരിക്കും.
അതില്‍ 25 പേര്‍ക്ക് വിവിധ വകുപ്പുകളില്‍ നിന്നുള്ള നിയമന ഉത്തരവ് രാംദാസ് അഠാവ്‌ലെ കൈമാറും. ബാക്കി 94 പേര്‍ക്ക് അതത് വകുപ്പുകളിലെ ഉദ്യോഗസ്ഥരില്‍ നിന്ന് നിയമന ഉത്തരവ് ലഭിക്കും. തപാല്‍ വകുപ്പ്, ഡിഫന്‍സ് എസ്‌റ്റേറ്റ്‌സ് ഓര്‍ഗനൈസേഷന്‍, ഇന്ത്യന്‍ നാവികസേന, ഡിഫന്‍സ് അക്കൗണ്ട്‌സ് (നാവികസേന), കേരള ഗ്രാമീണ്‍ ബാങ്ക്, സ്‌റ്റേറ്റ് ബാങ്ക് ഓഫ് ഇന്ത്യ, എല്‍ഐസി, റെയില്‍വേ, കസ്റ്റംസ്, സിജിഎസ്ടി എന്നിവയാണ് നിയമ ഉത്തരവുകള്‍ നല്‍കുന്ന മറ്റ് വകുപ്പുകള്‍.
പ്രധാനമന്ത്രി നരേന്ദ്ര മോദി നാളെ രാവിലെ പുതിയ റിക്രൂട്ട്‌മെന്റുകള്‍ക്ക് വീഡിയോ കോണ്‍ഫറന്‍സിംഗ് വഴി നിയമന ഉത്തരവ് വിതരണം ചെയ്യും. പുതുതായി നിയമിതരായവരെ പ്രധാനമന്ത്രി അഭിസംബോധനയും ചെയ്യും. കൊച്ചിയില്‍ നടക്കുന്ന റോസ്ഗാര്‍ മേളയില്‍ പങ്കെടുക്കുന്നവര്‍ പരിപാടിയുടെ തത്സമയ വെബ്കാസ്റ്റിന് സാക്ഷിയാകും.
തൊഴിലവസരങ്ങള്‍ സൃഷ്ടിക്കുന്നതിന് ഏറ്റവും ഉയര്‍ന്ന മുന്‍ഗണന നല്‍കാനുള്ള പ്രധാനമന്ത്രിയുടെ പ്രതിജ്ഞാബദ്ധതയുടെ പൂര്‍ത്തീകരണത്തിലേക്കുള്ള ചുവടുവെപ്പാണ് റോസ്ഗാര്‍ മേള. മേള കൂടുതല്‍ തൊഴിലവസരങ്ങള്‍ സൃഷ്ടിക്കുന്നതിലും യുവാക്കള്‍ക്ക് അവരുടെ ശാക്തീകരണത്തിനും ദേശീയ വികസനത്തില്‍ പങ്കാളിത്തത്തിനും അര്‍ത്ഥവത്തായ അവസരങ്ങള്‍ പ്രദാനം ചെയ്യുന്നതിനും ഉത്തേജകമായി പ്രവര്‍ത്തിക്കുമെന്ന് പ്രതീക്ഷിക്കുന്നു.
കേരളത്തില്‍ തിരുവനന്തപുരത്തും റോസഗാര്‍ മേള സംഘടിപ്പിക്കുന്നുണ്ട്. കേന്ദ്ര സഹകരണ, വടക്കു കിഴക്കന്‍ കാര്യ സഹമന്ത്രി ശ്രീ ബി എല്‍ വര്‍മ്മ മുഖ്യാതിഥിയാകും. കൊച്ചിയില്‍ നടക്കുന്ന റോസ്ഗാര്‍ മേളക്ക് ശേഷം, കേന്ദ്ര മന്ത്രി ശ്രീ രാംദാസ് അഠാവ്‌ലെ എറണാകുളം ഗസ്റ്റ് ഹൗസില്‍ മന്ത്രാലയത്തിന്റെ വിവിധ പദ്ധതികളുടെ ജില്ലാതല നിര്‍വ്വഹണം അവലോകനം ചെയ്യുകയും തുടര്‍ന്ന് പത്ര സമ്മേളനം അഭിസംബോധന ചെയ്യുകയും ചെയ്യും.
പ്രതികരിക്കാൻ ഇവിടെ എഴുതുക: