കോട്ടയം: അന്തരിച്ച മുന് മുഖ്യമന്ത്രി ഉമ്മന് ചാണ്ടിയെ സാമൂഹിക മാധ്യമത്തിലൂടെ അധിക്ഷേപിച്ച സംഭവത്തില് നടന് വിനായകനെതിരായ കേസ് പിന്വലിക്കണമെന്ന് ഉമ്മന് ചാണ്ടിയുടെ മകന് ചാണ്ടി ഉമ്മന്. ഉമ്മന് ചാണ്ടിയെ ഞങ്ങള്ക്ക് അറിയാം, ജനങ്ങള്ക്കും. വിനായകന് എന്താണ് പറഞ്ഞതെന്ന് കേട്ടില്ല. അത് എന്തായാലും അദേഹത്തിനെതിരെ കേസെടുക്കരുതെന്ന് ചാണ്ടി ഉമ്മന് വ്യക്തമാക്കി.
ഉമ്മന് ചാണ്ടി ഉണ്ടായിരുന്നെങ്കിലും ഇതുതന്നെയാകും പറയുകയെന്നും അദേഹം പറഞ്ഞു. ജനങ്ങള്ക്ക് നല്കിയ മുഴുവന് സ്നേഹം തിരിച്ചു വാങ്ങികൊണ്ടാണ് ഉമ്മന് ചാണ്ടി വിടവാങ്ങിയത്. മകന് എന്ന നിലയില് എല്ലാ ചികിത്സയും നല്ക്കിയിട്ടുണ്ടെന്നും ചാണ്ടി ഉമ്മന് പറഞ്ഞു. അതേസമയം യൂത്ത് കോണ്ഗ്രസ് പ്രവര്ത്തകരുടെ പരാതിയെ തുടര്ന്ന് എറണാകുളം നോര്ത്ത് പോലീസ് എടുത്ത കേസില് നടന് വിനായകനെ ഇന്നു ചോദ്യം ചെയ്യും.
കഴിഞ്ഞ ദിവസം വിനായകന്റെ കൊച്ചിയിലെ ഫ്ലാറ്റിന് നേരെ ആക്രമണമുണ്ടായി. വൈകിട്ട് നാല് മണിയോടെ കൊച്ചി കലൂര് സ്റ്റേഡിയത്തിന് പിന്നിലെ സ്റ്റേഡിയം ലിങ്ക് റോഡിലെ ഫ്ലാറ്റിലെത്തിയ സംഘമാണ് ആക്രമണം നടത്തിയത്. സംഘം ജനല്ച്ചില്ലുകള് അടിച്ച് തകര്ക്കുകയും വാതില് തകര്ക്കാന് ശ്രമിക്കുകയും ചെയ്തു. അക്രമം നടത്തിയവര് ഉമ്മന് ചാണ്ടിക്ക് അനുകൂലമായി മുദ്രാവാക്യം വിളിച്ചുകൊണ്ടാണ് എത്തിയതെന്നാണ് റിപ്പോര്ട്ട്. പൊലീസും ഫ്ലാറ്റിലെ സുരക്ഷാജീവനക്കാരും ചേര്ന്നാണ് ഇവരെ പിടിച്ച് മാറ്റിയത്.
