തിരുവല്ല: പൊതു സിവില്‍കോഡ് നടപ്പാക്കുന്നത് സംബന്ധിച്ച് നിലപാട് വ്യക്തമാക്കി മാര്‍ത്തോമ്മാ സഭ. വിഷയത്തില്‍ ചര്‍ച്ചകള്‍ ആകാമെന്നും ഏകപക്ഷീയമായും നിര്‍ബന്ധപൂര്‍വ്വവും നടപ്പാക്കരുതെന്നും ഡോ. തിയഡോഷ്യസ് മാര്‍ത്തോമ്മാ മെത്രാപ്പൊലീത്തയുടെ വാര്‍ത്താക്കുറിപ്പില്‍ പറയുന്നു.
പൊതു സിവില്‍കോഡ് പ്രത്യക്ഷത്തില്‍ സ്വീകാര്യമായി തോന്നാം. എന്നാല്‍ ഇന്ത്യയെപ്പോലെ വൈവിധ്യങ്ങള്‍ നിറഞ്ഞ ഒരു ജനാധിപത്യ മതനിരപേക്ഷ രാജ്യത്ത് ഇതിനെ പിന്തുണയ്‌ക്കാനാവില്ല. സ്വാതന്ത്ര്യലബ്ധി മുതലുള്ള ആദ്യകാല ചര്‍ച്ചകളും ശ്രമങ്ങളും ഉണ്ടായിരുന്നിട്ടും, യുസിസി ഒരിക്കലും യാഥാര്‍ത്ഥ്യമായില്ല എന്ന വസ്തുത ഇന്ത്യയില്‍ വ്യക്തി നിയമങ്ങള്‍ക്ക് പകരം വയ്‌ക്കുന്ന പൊതു സിവില്‍ നിയമം നടപ്പിലാക്കുന്നതിലെ സങ്കീര്‍ണതകളെ തുറന്നു കാട്ടുന്നുവെന്നും മെത്രാപ്പോലിത്ത പറയുന്നു.
2018ലെ ലോ കമ്മീഷന്‍ പൊതു സിവില്‍കോഡ് ആവശ്യമോ അഭികാമ്യമോ അല്ലെന്നാണ് പ്രഖ്യാപിച്ചത്. ഭാവിയില്‍ ഒരു പാര്‍ലമെന്റില്‍ പൊതു സിവില്‍കോഡ് അവതരിപ്പിക്കുകയാണെങ്കില്‍, ”തങ്ങള്‍ അതിന് വിധേയരാകാന്‍ തയ്യാറാണെന്ന് പ്രഖ്യാപിക്കുന്നവര്‍ക്ക് മാത്രമേ കോഡ് ബാധകമാകൂ” എന്ന വ്യവസ്ഥ ഉണ്ടാക്കണമെന്ന് ഭരണഘടനാ അസംബ്ലി ചര്‍ച്ചകളില്‍ ഡോ. ബി. ആര്‍. അംബേദ്കര്‍ നിലപാട് സ്വീകരിച്ചിരുന്നു.
രാജ്യത്ത് സാമ്പത്തിക അസമത്വം നിലനില്‍ക്കുന്നു. ന്യൂനപക്ഷങ്ങള്‍ക്ക് ചില പ്രത്യേകാവകാശങ്ങള്‍ ഭരണഘടന നല്‍കുന്നുണ്ട്. ഇന്ത്യയെപോലുളള ബഹുസ്വരാത്മക സമൂഹത്തില്‍ പൊതു സിവില്‍ കോഡ് നടപ്പാക്കുന്നത് അപ്രായോഗികമാണ്, മെത്രാപ്പോലിത്ത വ്യക്തമാക്കി.
പ്രതികരിക്കാൻ ഇവിടെ എഴുതുക: