ചാലക്കുടി: പുക പരിശോധിക്കാന്‍ ദിവസങ്ങള്‍ ബാക്കിനില്‍ക്കെ സര്‍ട്ടിഫിക്കറ്റ് കാണിച്ചില്ലെന്നാരോപിച്ച് മാധ്യമ പ്രവര്‍ത്തകനില്‍ നിന്ന് പിഴ ഈടാക്കിയ കൊരട്ടി പോലീസ് നടപടി വിവാദത്തില്‍.
കഴിഞ്ഞ 29 ന് ഇരുപാര്‍ട്ടികള്‍ തമ്മിലുണ്ടായ തര്‍ക്കത്തിന്റെ വാര്‍ത്ത ശേഖരിക്കാന്‍ മാധ്യമ പ്രവര്‍ത്തകനായ ജെ. ജെക്സ് മേലൂര്‍ ജംഗ്ഷനിലേക്ക് സ്‌കൂട്ടറില്‍ ചെന്നപ്പോള്‍ അവിടെയുണ്ടായിരുന്ന കൊരട്ടി എസ്.ഐ. കെ.എസ്. സുബിന്ദാണ് പിഴ ചുമത്തിയത്. പിഴ അക്ഷയ കേന്ദ്രത്തില്‍ അടച്ച ശേഷം വാഹന പുക പരിശോധനാ കേന്ദ്രത്തില്‍ ചെന്നപ്പോഴാണ് സര്‍ട്ടിഫിക്കറ്റിന്റെ കാലാവധി കഴിഞ്ഞിട്ടില്ലെന്ന വിവരമറിയുന്നത്.
പുതിയതായി സ്ഥലം മാറി വന്ന എസ്.ഐ. രാത്രികാലങ്ങളിലും വാഹനത്തിന്റെ പുക പരിശോധനാ സര്‍ട്ടിഫിക്കറ്റ് ആവശ്യപ്പെട്ട് യാത്രക്കാരോട് വളരെ മോശമായി പെരുമാറുന്നതായും പരാതിയുണ്ട്. അനാവശ്യമായി പിഴ ചുമത്തിയ കൊരട്ടി എസ്.ഐക്കെതിരെ ഉന്നത പോലീസ് ഉദ്യോഗസ്ഥര്‍ക്ക് പരാതി നല്‍കുമെന്ന് ജെക്സ് പറഞ്ഞു.
പ്രതികരിക്കാൻ ഇവിടെ എഴുതുക: