പാവറട്ടി: പാവറട്ടി പഞ്ചായത്ത് പ്രസിഡന്റ് സിന്ധു അനില്കുമാറിനെ അയോഗ്യയായി പ്രഖ്യാപിച്ചു. മഹിളാ കോണ്ഗ്രസ് നേതാവും പഞ്ചായത്ത് ആരോഗ്യ, വിദ്യാഭ്യാസ സ്റ്റാന്ഡിങ് കമ്മിറ്റി ചെയര്പേഴ്സണുമായ വിമല സേതുമാധവന് തെരഞ്ഞെടുപ്പ് കമ്മീഷനില് നല്കിയ പരാതിയെ തുടര്ന്നാണ് നടപടി.
കൂറുമാറ്റ നിരോധന നിയമപ്രകാരമാണ് അയോഗ്യയാക്കിയത്. കോണ്ഗ്രസ് പിന്തുണയോടെ മത്സരിച്ച് വിജയിക്കുകയും ഇടതുപക്ഷത്തെയും ബിജെപിയെയും പരാജയപ്പെടുത്തിയാണ് ഒന്നാം വാര്ഡില് നിന്ന് സിന്ധു അനില്കുമാര് വിജയിച്ചു വന്നത്.
വിജയിച്ച ശേഷം സിപിഎമ്മിന്റെ പിന്തുണയോടുകൂടി രണ്ടര വര്ഷം പഞ്ചായത്ത് പ്രസിഡണ്ടായി ഭരണം നടത്തുകയായിരുന്നു.
സിപിഎമ്മിന്റെ ലോക്കല് സെക്രട്ടറി ബാബു ആന്റണി ഉള്പ്പെടെ സിന്ധു അനില്കുമാറിന് അനുകൂലമായി മൊഴി കൊടുത്തിരുന്നു. അഡ്വ. സാജിത ഹാജരായി. ദൈവം നല്കിയ വിധിയെന്ന് ഡി.സി.സി. സെക്രട്ടറി വി. വേണുഗോപാല് പറഞ്ഞു. വിധിക്കെതിരെ ഹൈക്കോടതിയില് അപ്പീല് പോകുമെന്ന് സിന്ധു അനില്കുമാര് പറഞ്ഞു.
