പുതുക്കാട്: മുട്ടിത്തടി, പ്ലാവിന്കുന്ന് റോഡില് മാലിന്യം തള്ളിയ ഹോട്ടല് ഉടമയില് നിന്ന് തൃക്കൂര് പഞ്ചായത്ത് 25,000 രൂപ പിഴയീടാക്കി.
തൃശൂര് വടക്കേ സ്റ്റാന്റിന് സമീപം പ്രവര്ത്തിക്കുന്ന മംഗള ടവര് ഹോട്ടല് ഉടമയില് നിന്നാണ് പിഴ ഈടാക്കിയത്. മാലിന്യം പരിശോധിച്ച നാട്ടുകാര് ഹോട്ടലിന്റെ ബില്ലുകളും അനുബന്ധ രേഖകളും കണ്ടെടുത്തിരുന്നു. നാട്ടുകാര് വിവരമറിയിച്ചതിനെ തുടര്ന്ന് തൃക്കൂര് പഞ്ചായത്ത് അധികൃതരും വരന്തരപ്പിള്ളി പോലീസും സ്ഥലത്തെത്തി.
ചാക്കുകളിലാക്കി വഴിയരികിലും കനാല് പരിസരത്തും തള്ളിയ മാലിന്യം പോലീസ് ഇടപെട്ട് ഹോട്ടല് ഉടമയെ വിളിച്ചുവരുത്തി ഇന്നലെ തിരിച്ചെടുപ്പിച്ചിരുന്നു. പൊതുസ്ഥലത്ത് മാലിന്യം അശ്രദ്ധമായി ഉപേക്ഷിച്ചതിന് പരിസ്ഥിതി സംരക്ഷണ നിയമം, പഞ്ചായത്ത് രാജ് ചട്ടം എന്നിവ പ്രകാരമാണ് പിഴയിട്ടത്.
