ചെന്നൈ: ജയിലില്‍ കഴിയുന്ന മുന്‍ മന്ത്രി സെന്തില്‍ ബാലാജിയെ പുറത്താക്കിയ സംഭവത്തില്‍ നിയമനടപടി സ്വീകരിക്കുമെന്ന തമിഴ്നാട് മുഖ്യമന്ത്രി എംകെ സ്റ്റാലിന്റെ പ്രസ്താവനയ്‌ക്കെതിരെ എഐഎഡിഎംകെ വക്താവ് കോവൈ സത്യന്‍. സംസ്ഥാനം കണ്ടിട്ടുള്ളതില്‍ വച്ച് ഏറ്റവും കഴിവുകെട്ട മുഖ്യമന്ത്രിയാണ് സ്റ്റാലിനെന്ന്് അദേഹം പറഞ്ഞു.
തൊഴില്‍ തട്ടിപ്പ് കേസിലാണ് മന്ത്രി അറസ്റ്റിലായത്. തമിഴ്നാട് കണ്ടിട്ടുള്ളതില്‍ വച്ച് ഏറ്റവും കഴിവുകെട്ട മുഖ്യമന്ത്രിയാണ് എംകെ സ്റ്റാലിന്‍ എന്നാണ് ഞങ്ങള്‍ പറയുന്നത്. വി സെന്തില്‍ ബാലാജിക്ക് മന്ത്രിയായി തുടരാന്‍ കഴിയില്ലെന്ന് ഗവര്‍ണര്‍ ആദ്യം കത്ത് അയച്ചിട്ടുണ്ടെന്നും സത്യന്‍ ദേശീയ മാധ്യമത്തോട് പറഞ്ഞു.
എംകെ സ്റ്റാലിന്റെ ഇരട്ടത്താപ്പ് ഇന്ന് പുറത്തുവരുകയാണ്. പ്രതിപക്ഷത്തായിരുന്നപ്പോള്‍ അദ്ദേഹത്തിന്റെ നിലപാട് ഒന്നും ഭരണപക്ഷത്തായിരിക്കുമ്പോള്‍ അദ്ദേഹത്തിന്റെ നിലപാട് മറ്റൊന്നുമാണെന്ന് അദ്ദേഹം പറഞ്ഞു. ജയിലില്‍ കഴിയുന്ന മന്ത്രി സെന്തില്‍ ബാലാജിയെ പുറത്താക്കിയ സംഭവത്തില്‍ ഗവര്‍ണര്‍ ആര്‍എന്‍ രവിക്കെതിരെ എംകെ സ്റ്റാലിന്‍ പ്രതികരിച്ചിരുന്നു.
അദ്ദേഹത്തിന് അതിന് അവകാശമില്ലെന്നും തന്റെ സര്‍ക്കാര്‍ വിഷയത്തില്‍ നിയമപരമായി മുന്നോട്ട് പോകുമെന്നും സ്റ്റാലിന്‍ പറഞ്ഞു. കഴിഞ്ഞ ദിവസം തമിഴ്നാട് ഗവര്‍ണര്‍ ആര്‍എന്‍ രവി ഡിഎംകെ നേതാവ് ബാലാജിയെ മന്ത്രിസഭയില്‍ നിന്ന് അടിയന്തര പ്രാബല്യത്തോടെ നീക്കം ചെയ്തതിനു പിന്നാലെയാണ് സ്റ്റാലിന്‍ പ്രതികരിച്ചത്.
പ്രതികരിക്കാൻ ഇവിടെ എഴുതുക: