കൊച്ചി: മഅദനിക്കൊപ്പം കൊച്ചിയില്‍ എത്തിയ പിഡിപി നേതാവിനെതിരെ പരാതി നല്‍കി മാധ്യമപ്രവര്‍ത്തക. വാട്സ്ആപ്പിലൂടെ നിരന്തരം ലൈംഗിക ചുവയുളള സന്ദേശങ്ങള്‍ അയച്ചതിനെ തുടര്‍ന്നാണ് മാധ്യമപ്രവര്‍ത്തക പോലീസില്‍ പരാതി നല്‍കിയത്. പിഡിപി സംസ്ഥാന ജനറല്‍ സെക്രട്ടറി നിസാര്‍ മേത്തറിനെതിരെയാണ് പരാതി. നിസാര്‍ അയച്ച സന്ദേശങ്ങളുടെ സ്‌ക്രീന്‍ഷോട്ടുകളും പുറത്തുവന്നിട്ടുണ്ട്. രാത്രിയെന്നോ പകലെന്നോ ഇല്ലാതെ ഇയാള്‍ നിരന്തരം ശല്യം ചെയ്യുകയാണെന്ന് പരാതിയില്‍ മാധ്യമപ്രവര്‍ത്തക പറയുന്നു. ജാമ്യത്തില്‍ ഇളവ് നേടി കേരളത്തിലെത്തിയ മഅദനിയുടെ ആരോഗ്യവിവരങ്ങള്‍ മാധ്യമങ്ങളെ അറിയിക്കാന്‍ പിഡിപി ചുമതലപ്പെടുത്തിയ നേതാവാണ് നിസാര്‍ മേത്തര്‍.
വാര്‍ത്തക്കായി മഅദനിയുടെ ആരോഗ്യവിവരങ്ങള്‍ തിരക്കിയ മാദ്ധ്യമപ്രവര്‍ത്തകയോട് രണ്ട് ദിവസങ്ങള്‍ കഴിഞ്ഞതോടെ നിസാര്‍ ലൈംഗിക ചുവയുള്ള സന്ദേശങ്ങളുമായി സമീപിക്കുകയായിരുന്നു. മാധ്യമപ്രവര്‍ത്തക താക്കീത് നല്‍കിയെങ്കിലും ഇയാള്‍ പിന്‍മാറിയില്ല. തുടര്‍ന്നാണ് പരാതി നല്‍കിയത്. മാധ്യമപ്രവര്‍ത്തകയുടെ കാര്‍കൂന്തലിനെയും അംഗലാവണ്യത്തെയും കുറിച്ച് ദ്വയാര്‍ത്ഥത്തോടെയുളള വര്‍ണനയും സന്ദേശങ്ങളുമാണ് ഇയാള്‍ തുടര്‍ച്ചയായി അയച്ചുകൊണ്ടിരുന്നത്. പണവും നേരിട്ടല്ലാത്ത രീതിയില്‍ ഓഫര്‍ ചെയ്യുന്നുണ്ട്. വിഷയത്തില്‍ പിഡിപി പ്രതികരിച്ചിട്ടില്ല. തിങ്കളാഴ്ചയാണ് മഅദനി കേരളത്തില്‍ എത്തിയത്. ബംഗലൂരു സ്ഫോടന കേസില്‍ ജാമ്യത്തില്‍ കഴിയുകയായിരുന്ന മഅദനി ജാമ്യവ്യവസ്ഥയില്‍ ഇളവ് വാങ്ങിയാണ് രോഗാവസ്ഥയിലുളള പിതാവിനെ കാണാന്‍ കേരളത്തിലെത്തിയത്. കേരളത്തിലെത്തിയതോടെ ആരോഗ്യനില മോശമായെന്ന് പറഞ്ഞ് കൊച്ചിയിലെ സ്വകാര്യ ആശുപത്രിയില്‍ ചികിത്സ തുടരുകയാണ് മഅദനി.
പ്രതികരിക്കാൻ ഇവിടെ എഴുതുക: