മുംബൈ: നടന്‍ സല്‍മാന്‍ ഖാനെ ഉറപ്പായും കൊല്ലുമെന്ന ഭീഷണിയുമായി ഗുണ്ടാ നേതാവ് ഗോള്‍ഡി ബ്രാര്‍. തന്റെ അടുത്ത സുഹൃത്തിന് ലഭിച്ച ഭീഷണി ഇമെയിലുകള്‍ സംബന്ധിച്ച് സല്‍മാന്‍ ഖാന് പോലീസില്‍ പരാതി നല്‍കിയതിന് പിന്നാലെയാണ് ഗുണ്ടാ സംഘത്തിന്റെ വെല്ലുവിളി. ഇന്ത്യാ ടുഡേയ്‌ക്ക് നല്‍കിയ പ്രത്യേക അഭിമുഖത്തിലാണ് ഗോള്‍ഡി ബ്രാര്‍ വധ ഭീഷണി മുഴക്കിയിരിക്കുന്നത്.
‘ഞങ്ങള്‍ സല്‍മാന്‍ ഖാനെ കൊല്ലും, തീര്‍ച്ചയായും അവനെ കൊല്ലും. ഇത് സല്‍മാന്‍ ഖാനെക്കുറിച്ച് മാത്രമല്ല. ജീവിച്ചിരിക്കുന്നിടത്തോളം കാലം ഞങ്ങളുടെ എല്ലാ ശത്രുക്കളെയും ഞങ്ങള്‍ വകവരുത്തും. സല്‍മാന്‍ ഖാനാണ് ഞങ്ങളുടെ പ്രധാന ലക്ഷ്യം. ആ ലക്ഷ്യം വിജയിക്കുന്നവരെ ഞങ്ങള്‍ ശ്രമിക്കും’ എന്നാണ് ഗോള്‍ഡി ബ്രാര്‍ ഭീഷണി മുഴക്കിയത്. ഇത് കൂടാതെ, യുവ അകാലിദള്‍ നേതാവ് വിക്കി മിദ്ദുഖേരയുടെ കൊലപാതകത്തിന് പ്രതികാരം ചെയ്യാനാണ് സിദ്ധു മൂസ് വാലയെ കൊലപ്പെടുത്തിയതെന്നും ഗോള്‍ഡി ബ്രാര്‍ പറഞ്ഞു.
കനേഡിയന്‍ ഗവണ്‍മെന്റ്, രാജ്യത്തെ ഏറ്റവും വലിയ 25 കുറ്റവാളികളുടെ കൂട്ടത്തില്‍ ഗോള്‍ഡി ബ്രാര്‍ എന്ന് വിളിപ്പേരുള്ള സതീന്ദര്‍ സിംഗ് ബ്രാറിനെ ഉള്‍പ്പെടുത്തിയിട്ടുണ്ട്. ലോറന്‍സ് ബിഷ്ണോയിയുടെ സംഘത്തിലെ പ്രമുഖനാണ് ബ്രാര്‍. 2017 ല്‍ സ്റ്റുഡന്റ് വിസയില്‍ കാനഡയിലെത്തിയ 29 കാരന്‍, 2022 മെയ് 29 ന് പഞ്ചാബിലെ മാന്‍സ ജില്ലയില്‍ വെടിയേറ്റ് മരിച്ച സിദ്ധു മൂസ്വാല എന്നറിയപ്പെടുന്ന ശുഭ്ദീപ് സിംഗ് സിദ്ധുവിന്റെ കൊലപാതകത്തിന്റെ ഉത്തരവാദിത്തം ഏറ്റെടുത്തിരുന്നു.
പ്രതികരിക്കാൻ ഇവിടെ എഴുതുക: