കൊച്ചി:സംവിധായകനും പ്രൊഡക്ഷന് എക്സിക്യൂട്ടീവുമായ ബൈജു പറവൂര് (42) അന്തരിച്ചു. സ്വന്തമായി കഥയും തിരക്കഥയുമെഴുതി സംവിധാനം ചെയ്ത ആദ്യ സിനിമ സീക്രട്ട് റിലീസിനൊരുങ്ങുന്നതിനിടെയാണ് സംവിധായകന്റെ അകാല അന്ത്യം. നന്തികുളങ്ങര കൊയ്പ്പാമഠത്തില് ശശി- സുമതി ദമ്പതികളുടെ മകനാണ്.
പ്രൊഡക്ഷന് എക്സിക്യൂട്ടീവ് എന്ന നിലയില് സിനിമയിലെത്തിയ ബൈജു കഴിഞ്ഞ 20 വര്ഷമായി രംഗത്തു പ്രവര്ത്തിക്കുന്നുണ്ട്. 45 സിനിമകളുടെ ഭാഗമായി. ധന്യം, മൈഥിലി, കൈതോലച്ചാത്തന് സിനിമകളുടെ പ്രൊഡക്ഷന് കണ്ട്രോളറായിരുന്നു.
ഭക്ഷ്യവിഷബാധയാണ് മരണ കാരണമെന്നു ബന്ധുക്കളും സുഹൃത്തുക്കളും പറയുന്നു. ഒരു സിനിമയുമായി ബന്ധപ്പെട്ട ചര്ച്ചയ്ക്കായി കോഴിക്കോടു പോയി തിരിച്ചു വരുന്നതിനിടെ ബൈജു ഹോട്ടലില് നിന്നു ഭക്ഷണം കഴിച്ചിരുന്നു. പിന്നാലെ അസ്വസ്ഥതകള് തോന്നി. കുന്നംകുളത്തു ഭാര്യ വീട്ടില് കയറി സമീപത്തുള്ള ഡോക്ടറെ കണ്ട ശേഷം പറവൂരിലെ വീട്ടില് തിരിച്ചെത്തി.
എന്നാല് ആരോഗ്യനില വഷളായതോടെ കുഴുപ്പിള്ളിയിലും തുടര്ന്നു കൊച്ചിയിലെ സ്വകാര്യ ആശുപത്രിയിലും പ്രവേശിപ്പിച്ചു. ഇന്നലെ പുലര്ച്ചെയോടെ മരിച്ചു. സംസ്കാരം നടത്തി. ഭാര്യ: ചിത്ര. മക്കള്: ആരാധ്യ, ആരവ്.
