ചാവക്കാട്: കടപ്പുറം ഗ്രാമപഞ്ചായത്ത് തൊട്ടാപ്പില്‍ നിന്നും എം.ഡി.എം.എയുമായി പിടിയിലായ യുവാവ് പോലീസ് ജീപ്പില്‍ നിന്നും ഇറങ്ങിയോടി. ഇയാളെ പാലക്കാട് നിന്നും പോലീസ് പിടികൂടി. ചാവക്കാട് കടപ്പുറം ഗ്രാമപഞ്ചായത്ത് തൊട്ടാപ്പ് ലൈറ്റ് ഹൗസ് പരിസരത്ത് നിന്ന് പിടിയിലായ തൊഴിയൂര്‍ പോക്കാക്കില്ലത്തെ വീട്ടില്‍ ഹാഫിഷാ (24) ണ് പോലീസ് ജീപ്പില്‍ നിന്നും ഇറങ്ങിയോടിയത്.
കഴിഞ്ഞ ദിവസം രാത്രിയിലായിരുന്നു സംഭവം. 0.3 ഗ്രാം അതിമാരക ലഹരിമരുന്നായ എം.ഡി.എം.എയുമായാണ് ഇയാള്‍ പിടിയിലായത്. ജീപ്പില്‍ കയറ്റിയ സമയത്ത് ഇയാള്‍ പോലീസിന്റെ കണ്ണുവെട്ടിച്ച് ജീപ്പില്‍ നിന്നും ചാടി രക്ഷപ്പെടുകയായിരുന്നു. തുടര്‍ന്ന് പോലീസ് പ്രതിക്കായി വ്യാപക തെരച്ചില്‍ നടത്തി. ഇതിനിടയിലാണ് ഇയാള്‍ തമിഴ്‌നാട്ടിലെ സത്യമംഗലത്തേക്ക് പുറപ്പെട്ടതായി പോലീസിന് വിവരം ലഭിച്ചത്. തുടര്‍ന്ന് പോലീസ് പാലക്കാട് നിന്നും ഇയാളെ പിടികൂടുകയായിരുന്നു.
ചാവക്കാട് എസ്എച്ച്ഒ വിപിന്‍ കെ. വേണുഗോപാലിന്റെ നേതൃത്വത്തില്‍ എസ്‌ഐമാരായ സിസില്‍ രാജ്, ബിജു പട്ടാമ്പി, സിപിഒമാരായ ഇ.കെ ഹംദ്, മെല്‍വിന്‍, രണ്‍ദീപ്, മുജീബ്, വിനോദ് എന്നിവരടങ്ങിയ പോലീസ് സംഘമാണ് പ്രതിയെ അറസ്റ്റ് ചെയ്തത്. പ്രതിയെ ചാവക്കാട് കടപ്പുറം തൊട്ടാപ്പില്‍ കൊണ്ടുവന്ന് തെളിവെടുപ്പ് നടത്തി.
പ്രതികരിക്കാൻ ഇവിടെ എഴുതുക: