അമ്പലപ്പുഴ: മയക്കുമരുന്ന് മൊത്ത വില്‍പ്പനക്കാരനേയും, സഹായിയായ യുവതിയേയും പുന്നപ്ര പോലീസ് എംഡിഎംഎയുമായി പിടികൂടി. കൊല്ലം കൊട്ടിയം വയലില്‍ പുത്തന്‍വീട്ടില്‍ ആഷിര്‍ (35), തൃശൂര്‍ വടക്കാഞ്ചേരി തലപ്പള്ളി വീട്ടില്‍ നാഗമ്മ (24) എന്നിവരെയാണ് അറസ്റ്റു ചെയ്തത്.
വെള്ളിയാഴ്ച രാത്രി ഒന്‍പതോടെയാണ് ഇവരെ പിടികൂടിയത്. ഇവര്‍ സഞ്ചരിച്ചിരുന്ന ഇന്നോവ കാറും പോലീസ് കസ്റ്റഡിയിലെടുത്തു. 11 ഗ്രാം എംഡിഎംഎയും സിറിഞ്ചുകളും ഇവരുടെ പക്കല്‍ നിന്നും കണ്ടെടുത്തു. രഹസ്യ വിവരത്തെ തുടര്‍ന്ന് പുന്നപ്ര പോലീസ് സ്റ്റേഷനു മുന്നില്‍ വെച്ച് കൈകാണിച്ചെങ്കിലും നിര്‍ത്താതെ പോയതിനെ തുടര്‍ന്ന് പിന്നാലെ പോയി വണ്ടാനം ഭാഗത്തുവെച്ച് കാര്‍ തടഞ്ഞു നിര്‍ത്തിയാണ് പിടികൂടിയത്.
ബംഗലൂരുവില്‍ നിന്നും എംഡിഎംഎ കൊണ്ടുവന്ന് ആലപ്പുഴയിലെ വില്‍പ്പനക്കാര്‍ക്ക് നല്‍കി വരുകയായിരുന്ന ഇവര്‍ കുറച്ചു നാളുകളായി പോലീസിന്റെ നിരീക്ഷണത്തിലായിരുന്നു. സൈബര്‍ സെല്ലിന്റെ സഹായത്തോടെ നിരീക്ഷണം നടത്തുന്നതിനിടെയാണ് ഇവര്‍ ഇന്നോവ കാറില്‍ വരുന്ന വിവരം അറിഞ്ഞത്. വര്‍ഷങ്ങളായി എറണാകുളത്ത് വാടക വീടുകളിലാണ് ഇരുവരും താമസിച്ചു വരുന്നത്.
യുവതിയുടെ പേരില്‍ തൃശൂര്‍ എരുമപ്പെട്ടിയില്‍ കൊലപാതക ശ്രമ കേസും, വിവിധ സ്റ്റേഷനുകളില്‍ മോഷണം, വഞ്ചനാ കേസുകളും നിലവിലുണ്ടെന്ന് പോലീസ് പറഞ്ഞു.
പ്രതികരിക്കാൻ ഇവിടെ എഴുതുക: