ചെന്നൈ: ഡിഎംകെ എം പിയും മുൻ മുഖ്യമന്ത്രി കരുണാനിധിയുടെ മകളുമായ കനിമൊഴിയെ ബസില്‍ കയറ്റിയതിന് പിന്നാലെ വനിതാ ഡ്രൈവറായ യുവതിയുടെ ജോലി നഷ്ടമായി. കോയമ്പത്തൂരില്‍ സ്വകാര്യ ബസില്‍ ഡ്രൈവറായി ജോലി ചെയ്യുന്ന എം ശർമിളയ്‌ക്കാണ് ഈ ദുര്‍വിധി ഉണ്ടായത്. കോയമ്പത്തൂരിലെ ആദ്യ വനിതാ ബസ് ഡ്രൈവര്‍ കൂടിയാണ് 24കാരി എം.ശര്‍മ്മിള. ശർമിളയെ നേരിട്ട് അഭിനന്ദിക്കാനാണ് കനിമൊഴി എംപി എത്തിയത്.
ബസിൽ യാത്ര ചെയ്യുന്നതിനൊപ്പം മലയാളി വേരുകളുള്ള ശർമിളയ്‌ക്ക് കൈ നിറയെ സമ്മാനങ്ങളും നൽകി സന്തോഷത്തോടെയാണ് കനിമൊഴി മടങ്ങിയത്. എന്നാൽ യാത്രക്കിടെ കനിമൊഴിയോട് ടിക്കറ്റ് ചോദിച്ച കണ്ടക്ടർക്കെതിരെ പരാതി പറയാൻ ചെന്ന ശർമിളയെ ബസ് ഉടമ ശകാരിക്കുകയായിരുന്നു. കനിമൊഴിയുടെ സന്ദർശനം അറിയിക്കാതിരുന്നതാണ് ഉടമയെ പ്രകോപിപ്പിച്ചത്. സ്വന്തം പ്രശസ്തിക്ക് വേണ്ടിയാണ് ശർമിള ഇത്തരത്തിൽ ചെയ്‌തതെന്നും ഇനി മുതൽ ജോലിക്ക് വരേണ്ടതില്ലെന്ന് ഉടമ വിലക്കിയതായും ശർമിള പറഞ്ഞു.
സംഭവം വിവാദമായതോടെ, ശർമിളയെ സംരക്ഷിക്കുമെന്നും പുതിയ ജോലി സംഘടിപ്പിച്ച് നല്‍കുമെന്നും കനിമൊഴി എംപി ഉറപ്പു നൽകി. കനിമൊഴി ശർമിളയ്‌ക്കൊപ്പം ബസിൽ യാത്ര ചെയ്യുന്നതിന്റെ ചിത്രങ്ങൾ ഇപ്പോള്‍ സമൂഹമാധ്യമങ്ങളിൽ വൈറലാണ്.
ബസ് ഉടമ പുതിയൊരു കഥയുമായി രംഗത്തെത്തിയിരിക്കുകയാണ്. ജോലിയിൽ നിന്നും ശര്‍മ്മിളയെ താന്‍ പുറത്താക്കിയിട്ടില്ലെന്നും ശർമിളയുടെ സ്വന്തം ഇഷ്‌ടപ്രകാരം ജോലി ഉപേക്ഷിക്കുകയുമായിരുന്നെന്നാണ് ഇപ്പോള്‍ ഉടമ നല്‍കുന്ന വിശദീകരണം.
പ്രതികരിക്കാൻ ഇവിടെ എഴുതുക: