തിരുവനന്തപുരം: ഗവര്‍ണര്‍ക്കെതിരെ പ്രമേയം അവതരിപ്പിച്ച നേതാവാണോ നിഖില്‍ തോമസിനായി ശുപാര്‍ശ ചെയ്തത്. എംഎസ്എം കോളേജ് മാനേജര്‍ സിപിഎം നേതാവിന്റെ പേര് പുറത്തുവിടണമെന്ന് കേന്ദ്രമന്ത്രി വി. മുരളീധരന്‍. വ്യാജ സര്‍ട്ടിഫിക്കറ്റ് നല്‍കി എസ്എഫ്‌ഐ നേതാവ് നിഖില്‍ എംഎസ്എം കോളേജില്‍ അഡ്മിഷന്‍ നേടിയെടുത്തതുമായി ബന്ധപ്പെട്ട് പ്രതികരിക്കുകയായിരുന്നു അദ്ദേഹം.
ഉന്നതവിദ്യാഭ്യാസമേഖലയെ തകര്‍ക്കുന്നവരുടെ പേര് കേരളത്തിലെ ജനങ്ങള്‍ അറിയേണ്ടതുണ്ട്. നിഖില്‍ തോമസ് വിവാദത്തില്‍ ഗവര്‍ണര്‍ നേരിട്ട് ഇടപെട്ട് അന്വേഷണം ഉണ്ടാകണം, സംഭവത്തിന് പിന്നിലെ യഥാര്‍ത്ഥ വസ്തുതകള്‍ പുറത്തുകൊണ്ടുവരണം. കോളേജ് പ്രവേശന തിയതി ഒരു വിദ്യാര്‍ത്ഥിക്കായി നീട്ടി നല്‍കുക. റായ്പൂരില്‍ നിന്നും വ്യാജ സര്‍ട്ടിഫിക്കറ്റ് നല്‍കി പ്രവേശനം നേടുക, ഇതൊന്നും ഒരാള്‍ മാത്രം വിചാരിച്ചാല്‍ സാധ്യമാകുന്ന ഒന്നല്ല. പിന്നിലും ആളുകളുണ്ടാകും. ഒരേസമയം കലിംഗയിലും കായംകുളത്തും പഠിക്കാന്‍ നിഖില്‍ തോമസ് കുമ്പിടിയാണോയെന്നും വി. മുരളീധരന്‍ പരിഹസിച്ചു.
കോളേജ് അധികൃതര്‍ സിപിഎം നേതാക്കളെ യജമാനന്മാരായി കാണുന്ന സര്‍വകലാശാല ഉദ്യോഗസ്ഥര്‍, നിയമനത്തിനായി ഇടപെടലുകള്‍ നടത്തുന്ന സിപിഎം ഉന്നതരെ കുറിച്ചും അന്വേഷണം നടത്തും. എസ്എഫ്‌ഐ എന്ത് ചെയ്താലും ന്യായീകരിക്കുന്ന സമീപനം നേതാക്കള്‍ നിര്‍ത്തണം. മുഖ്യമന്ത്രി പിണറായി വിജയന്‍ മൗനം വെടിയണമെന്നും അദ്ദേഹം ആവശ്യപ്പെട്ടു.
സത്യം പുറത്തുകൊണ്ടുവരുന്ന മാധ്യമപ്രവര്‍ത്തകര്‍ക്ക് എതിരെ കേസെടുക്കും. എന്നാല്‍ വ്യാജരേഖ ചമച്ചവരെയോ ആള്‍മാറാട്ടം നടത്തുന്നവരോ ഇതുവരെ കണ്ടുപിടിക്കാന്‍ പോലീസിനായിട്ടില്ല. തട്ടിപ്പുകാരെ സംരക്ഷിക്കുന്ന രീതി അംഗീകരിക്കാനാകില്ലെന്നും കേരള പോലീസിന്റെ ഒത്തുകളിയന്വേഷണം അവസാനിപ്പിക്കണമെന്നും വി. മുരളീധരന്‍ കൂട്ടിച്ചേര്‍ത്തു.
പ്രതികരിക്കാൻ ഇവിടെ എഴുതുക: