ചെങ്ങന്നൂര്‍:വയോധികയായ വീട്ടമ്മയ്‌ക്ക് വെട്ടേറ്റു. സംഭവത്തില്‍ ഭര്‍ത്താവിനെ പൊലിസ് കസ്റ്റഡിയിലെടുത്തു. മുളക്കുഴ പഞ്ചായത്ത് 11-ാം വാര്‍ഡില്‍ കൊഴുവല്ലൂര്‍ തുണ്ടത്തില്‍ കിഴക്കേക്കര വീട്ടില്‍ അമ്മിണി ബാബു (70)നാണ് വെട്ടേറ്റത്. ഇന്നലെ രാവിലെ 7.30 ഓടെയാണ് സംഭവം.വീട്ടില്‍ പാചകം ചെയ്തു കൊണ്ടിരിക്കുമ്പോഴാണ് വെട്ടേറ്റത്. കുറ്റകൃത്യത്തില്‍ ഭര്‍ത്താവ് എം.റ്റി ബാബു (72)വിനെ ചെങ്ങന്നൂര്‍ എസ്.ഐ എം.സി അഭിലാഷിന്റെ നേതൃത്വത്തിലുള്ള പൊലിസ് സംഘം കസ്റ്റഡിയിലെടുത്തു.
ഇയാള്‍ മാനസിക രോഗത്തിന് മരുന്ന് കഴിക്കുന്നതായി പൊലിസ് പറഞ്ഞു.നാല് മാസം മുന്‍പ് ഇയാള്‍ ആത്മഹത്യയ്‌ക്ക് ശ്രമിച്ചതായും അറിയുന്നു.അമ്മിണിയുടെ ഇടത് കൈയ്‌ക്കും പുരികത്തിനുമാണ് വെട്ടേറ്റത്.തലയ്‌ക്ക് അടിയേറ്റു.ഗുരുതരമായി പരുക്കേറ്റ ഇവരെ ആദ്യം ചെങ്ങന്നൂര്‍ ജില്ലാ ആശുപത്രിയിലും തുടര്‍ന്ന് വിദഗ്ദ പരിചരണത്തിനായി കോട്ടയം മെഡിക്കല്‍ കോളേജിലേക്കു മാറ്റി. ഇവരുടെ മകന്‍ നേരത്തെ മരിച്ചു പോയിരുന്നു. ഒരു മകളുള്ളത് വിദേശത്താണ്. അമ്മിണിയും ഭര്‍ത്താവ് ബാബുവും മാത്രമായിരുന്നു വീട്ടില്‍ ഉണ്ടായിരുന്നത്. അമ്മിണി തൊഴിലുറപ്പു തൊഴിലാളിയാണ്.
തൊട്ടടുത്ത മാവേലിക്കരയില്‍ ആറുവയസുള്ള മകളെ പിതാവ് വെട്ടിക്കൊലപ്പെടുത്തിയ സംഭവത്തിന്റെ വാര്‍ത്ത സൃഷ്ടിച്ച നടുക്കം വിട്ടുമാറുന്നതിനു മുമ്പ് കേട്ട ഈ സംഭവം ചെങ്ങന്നൂരിനെ അക്ഷരാര്‍ഥത്തില്‍ വീണ്ടും ഞെട്ടിച്ചിരിക്കുകയാണ്.ചെങ്ങന്നൂര്‍ പൊലിസ് മേല്‍ നടപടി സ്വീകരിച്ചു.
പ്രതികരിക്കാൻ ഇവിടെ എഴുതുക: