കൊച്ചി : അന്തരിച്ച മിമിക്രി കലാകാരനും നടനുമായിരുന്ന കൊല്ലം സുധിക്കൊപ്പം വാഹനാപകടത്തില് പരിക്കേറ്റ് ചികിത്സയിലായിരുന്ന നടന് ബിനു അടിമാലി ആശുപത്രി വിട്ടു. താന് പൂര്ണ്ണ ആരോഗ്യവാനാണ്. യാതൊരു കുഴപ്പവും ഇല്ല. എല്ലാവരുടേയും പ്രാര്ത്ഥനയാണ്. തനിക്ക് വേണ്ടി പ്രാര്ത്ഥിച്ച എല്ലാവരോടും നന്ദിയുണ്ടെന്നും നടന് ബിനു പ്രതികരിച്ചു. ആശുപത്രിയില് നിന്നും ഡിസ്ചാര്ജ് ആയശേഷം മാധ്യമപ്രവര്ത്തകരോട് സംസാരിക്കുകയായിരുന്നു അദ്ദേഹം.
എല്ലാവരും നന്നായി സപ്പോര്ട്ട് ചെയ്തു, എനിക്ക് വേണ്ടി പ്രാര്ത്ഥിച്ചു. കുഴപ്പങ്ങളൊന്നുമില്ലെന്ന് ബിനു അടിമാലി പറഞ്ഞു. അപകട സമയത്ത് ബിനു അടിമാലിക്കൊപ്പമുണ്ടായിരുന്ന ഉല്ലാസ് അരൂരും പരിക്കേറ്റ് ചികിത്സ തേടിയിരുന്നു.
ജൂണ് അഞ്ചിന് പുലര്ച്ചെ നാലരയോടെ തൃശ്ശൂര് കയ്പ്പമംഗലം പനമ്പിക്കുന്നില് വച്ചായിരുന്നു അപകടം സംഭവിക്കുന്നത്. വടകരയില് നിന്ന് പരിപാടി കഴിഞ്ഞ് തിരികെ തിരുവനന്തപുരത്തേക്ക് പോകുകയായിരുന്ന മിമിക്രി താരങ്ങള് സഞ്ചരിച്ച കാര് എതിരെ വന്ന പിക്കപ്പ് വാനുമായി കൂട്ടിയിടിക്കുകയായിരുന്നു. ഗുരുതരമായി പരിക്കേറ്റ സുധിയെ കൊടുങ്ങല്ലൂര് എ.ആര്. ആശുപത്രിയില് എത്തിച്ചെങ്കിലും ജീവന് രക്ഷിക്കാനായില്ല.
