കമ്പം: അരിക്കൊമ്പന്‍ വിഷയത്തില്‍ സമൂഹ മാധ്യമങ്ങളില്‍ തെറ്റായ വിവരങ്ങള്‍ പങ്കുവയ്‌ക്കുന്നവര്‍ക്കെതിരെ നടപടി എടുക്കുമെന്ന് തേനി ജില്ലാ കളക്ടര്‍ ഷാജീവന. ആന ജനവാസ മേഖലയിലേക്ക് എത്തുന്നുവെന്ന തരത്തിലടക്കം തെറ്റായ വിവരങ്ങള്‍ പലരും സമൂഹ മാധ്യമങ്ങളില്‍ പങ്കുവയ്‌ക്കുന്നത് ശ്രദ്ധയില്‍പ്പെട്ടതോടെയാണ് കളക്ടറുടെ അറിയിപ്പ്. ജനവാസ മേഖലയിലേക്ക് ഇറങ്ങുന്നത് തടയാന്‍ നടപടി എടുത്തിട്ടുണ്ടെന്നും 85 പേരടങ്ങുന്ന സംഘത്തെ 24 മണിക്കൂറും ആനയെ നിരീക്ഷിക്കുന്നുണ്ടെന്നും കളക്ടറുടെ അറിയിപ്പിലുണ്ട്.
ആന വനത്തില്‍ നിന്ന് ഇറങ്ങി വരാനുള്ള സാധ്യത കൂടി പരിഗണിച്ച് കമ്പം, പുതുപ്പെട്ടി, കെ.കെ. പെട്ടി, ഗൂഡല്ലൂര്‍ എന്നീ മുനിസിപ്പാലിറ്റികളില്‍ നിരോധനാജ്ഞ തുടരുമെന്നും കളക്ടര്‍ അറിയിച്ചു. നിലവില്‍ ഷണ്മുഖ നദി ഡാം ഭാഗത്തെ വനത്തിനുള്ളില്‍ തന്നെയാണ് അരിക്കൊമ്പന്‍ ഉള്ളത്. രാത്രി വെള്ളം കുടിക്കാനായി അണക്കെട്ട് പരിസരത്ത് എത്തുന്നുണ്ട്. പിന്നീട് പുലര്‍ച്ചയോടെ തിരികെ കാടുകയറും.
നിലവിലെ സാഹചര്യത്തില്‍ ആന ഉള്‍ക്കാട്ടില്‍ തന്നെ തുടരുമെന്നാണ് വനംവകുപ്പിന്റെ കണക്കുകൂട്ടല്‍. പുറത്തേക്കിറങ്ങി ശല്യം ഉണ്ടാക്കിയാല്‍ മാത്രം മയക്കുവെടി വയ്‌ക്കാനാണ് തീരുമാനം. കമ്പത്ത് കുങ്കിയാനകളും തുടരുകയാണ്. കഴിഞ്ഞമാസം 27ന് ആണ് അരിക്കൊമ്പന്‍ കമ്പം ടൗണിലിറങ്ങിയത്. പിന്നീട് കാട് കയറിയ ശേഷം അഞ്ച് ദിവസമായി ഷണ്മുഖ നദീ ഡാം പരിസരത്ത് തന്നെ തുടരുകയാണ്.
പ്രതികരിക്കാൻ ഇവിടെ എഴുതുക: