ഇടതും വലതും മാറിവന്നു, ചെങ്കലിലെ ലക്ഷംവീട് നിവാസികളുടെ ദുരിത ജീവിതത്തിന് മാത്രം മാറ്റമില്ല

ഹരി പെരുങ്കടവിള

അമരവിള: ചെങ്കല്‍ പഞ്ചായത്തിലെ ലക്ഷംവീട് നവീകരണപദ്ധതി  ചുവപ്പുനാടയില്‍ കുടുങ്ങി. തകര്‍ന്നുവീഴാറായ വീടുകള്‍ക്കുള്ളില്‍ ഭീതിയോടെ കഴിയുകയാണ് കോളനിനിവാസികള്‍. വര്‍ഷങ്ങള്‍ പഴക്കം ചെന്ന വീടുകളില്‍ മഴപെയ്താല്‍ ഒരുതുള്ളി വെള്ളം പോലും പുറത്തു പോകില്ല. ഏത് നിമിഷവും നിലംപൊത്താമെന്ന അവസ്ഥയിലാണ് പല വീടുകളുമെന്ന് കോളനിനിവാസികള്‍ പറയുന്നു.

കൊച്ചുകുട്ടികള്‍ അടക്കം താമസിക്കുന്ന 36 വീടുകളാണ് ഇവിടെ ഉള്ളത്. മഴക്കാലം ആകുന്നതോടെ വീടുകളുടെ ബലക്കുറവും ചോര്‍ച്ചയും കാരണം ഇവര്‍ ഭീതിയിലാണ്. 18 വര്‍ഷം മുമ്പ് ലക്ഷംവീട് കോളനികള്‍ ഒറ്റ വീടായി മാറിത്തുടങ്ങിയത് മുതലാണ് കഷ്ടകാലങ്ങളുടെ തുടക്കമായതെന്ന് കോളനി നിവാസികള്‍ പറയുന്നു. അന്ന് 36,000 രൂപയ്‌ക്കാണ് വീടുകള്‍ നിര്‍മിച്ചത്. ശേഷം നാളിതുവരെയും മാറി വരുന്ന പഞ്ചായത്തു ഭരണസമിതികള്‍ അറ്റകുറ്റപ്പണിക്കായി നയാപൈസ അനുവദിക്കാത്തതും വീടുകളുടെ ശോചനീയാവസ്ഥയ്‌ക്ക് കാരണമായി. പല വീടുകളുടെയും അകത്തളങ്ങളും മേല്‍ക്കൂരകളും തകര്‍ന്നു. സാമ്പത്തികമായി വളരെ പിന്നാക്കം നില്ക്കുന്ന കുടുംബങ്ങളാണ് ലക്ഷംവീടുകളെ ആശ്രയിക്കുന്നത്. സ്ത്രീകളുടെയും പെണ്‍കുട്ടികളുടെയും സുരക്ഷ ഉറപ്പുവരുത്താന്‍ വീടിനകത്ത് തന്നെ കക്കൂസ് നിര്‍മിക്കാന്‍ നിര്‍ഭയ സംഭവത്തിനുശേഷം ആ പേരില്‍ തന്നെ സര്‍ക്കാര്‍ ഫണ്ട് അനുവദിച്ചതുമാണ്. പക്ഷേ  അതൊന്നും ഈ ലക്ഷംവീട് കോളനിക്ക് ഇനിയും ലഭിച്ചിട്ടില്ല.

ലക്ഷംവീട് കോളനികള്‍ നവീകരിക്കുന്നതിലേക്ക് സര്‍ക്കാര്‍ വിവിധ പദ്ധതികള്‍ ആവിഷ്‌കരിച്ചിട്ടുണ്ടെങ്കിലും പ്ലാന്‍ ഫണ്ട് അടക്കമുള്ളവ പഞ്ചായത്തധികൃതര്‍ വഴിമാറ്റി ചെലവഴിക്കുന്നതായാണ് ആരോപണം ഉയരുന്നത്. യാതൊരുവിധ സുരക്ഷയും ഇല്ലാതെയാണ് കോളനി നിവാസികള്‍ ഇവിടെ കഴിയുന്നത്. കുടിവെള്ളം രണ്ടുദിവസത്തില്‍ ഒരിക്കല്‍ മാത്രമേ പൈപ്പുകളില്‍ നിന്ന് ലഭിക്കാറുള്ളൂ. കുടിവെള്ളക്ഷാമം നേരിടുന്ന കോളനികള്‍ അടക്കമുള്ള പ്രദേശങ്ങളില്‍ ജലജീവന്‍ പദ്ധതി നിര്‍ബന്ധമായും നടപ്പാക്കണമെന്ന പദ്ധതിയും ചെങ്കല്‍ പഞ്ചായത്തില്‍ ചുവപ്പുനാടയില്‍ കുരുങ്ങിക്കിടക്കുന്നു. അഞ്ചു കോടിരൂപ അനുവദിച്ചിട്ട് ഒരുവര്‍ഷമായെങ്കിലും ഇതിനെപ്പറ്റിയുള്ള യാതൊരുവിധ പ്രോജക്ടുകളും തയ്യാറാക്കാന്‍ ഈ ഭരണസമിതിക്കായിട്ടില്ല. കോളനി നിവാസികളായ തങ്ങളുടെ ജീവിതം വോട്ട് ചെയ്യാന്‍ മാത്രമായി ഒതുങ്ങിയിരിക്കുകയാണെന്ന് കോളനി നിവാസികള്‍ പ്രതികരിക്കുന്നു. രാത്രികാലത്ത് വേണ്ടത്ര വെളിച്ചമില്ലായ്‌മയും കോളനി നിവാസികളെ ദുരിതത്തിലാക്കുന്നു. 36 ഓളം കുടുംബങ്ങള്‍ തിങ്ങിനിറഞ്ഞ് താമസിക്കുന്ന ഈ കോളനിയില്‍ ഇന്നും പട്ടയം പോലും ലഭിക്കാത്ത പല കുടുംബങ്ങളുമുണ്ട്. സാധാരണക്കാരായ ഇവര്‍ക്കിടയില്‍ വിധവകളും രോഗികളും താമസിച്ചുവരുന്നു. അധികാരികള്‍ കോളനി സന്ദര്‍ശിച്ച് അപകടാവസ്ഥയിലുള്ള വീടുകള്‍ പുനര്‍നിര്‍മിച്ച് നിലവിലുള്ള ഭീതി അകറ്റാന്‍ തയ്യാറാകണമെന്ന് കോളനി നിവാസികള്‍ ആവശ്യപ്പെടുന്നു.