ന്യൂദല്‍ഹി: പുതിയ പാര്ലമെന്റ് മന്ദിരത്തിന്റെ ഉദ്ഘാടനം നിര്‍വ്വഹിച്ച പ്രധാനമന്ത്രിയെ അനുമോദിച്ച് ഇളയരാജ മുതല്‍ പി.ടി. ഉഷ വരെ. ഇന്ത്യയെ പുതിയ തലത്തിലേക്ക് ഉയര്‍ത്താനുള്ള കാഴ്ചപ്പാടുള്ള നേതാവാണ് മോദിയെന്നും ഈ സന്ദര്‍ഭത്തില്‍ അദ്ദേഹത്തിന് എല്ലാവിധ ഭാവുകങ്ങളും നേരുന്നുവെന്നായിരുന്നു ഇളയരാജയുടെ ട്വീറ്റ്.
പ്രധാനമന്ത്രി നേരത്തെ ട്വിറ്ററില്‍ പങ്കുവെച്ച പുതിയ പാര്ലമെന്റ് മന്ദിരത്തിന്റെ വീഡിയോ വീണ്ടും പങ്കുവെച്ചായിരുന്നു ഷാരൂഖ് ഖാന്റെ ട്വീറ്റ്. മാത്രമല്ല, ഈ വീഡിയോയ്‌ക്ക് സ്വന്തം ശബ്ദത്തില്‍ കമന്‍ററിയും ഷാരൂഖ് ഖാന്‍ നടത്തിയിരുന്നു. പുതിയ ഇന്ത്യയ്‌ക്ക് പുതിയ പാര്ലമെന്റ് എന്നാണ് ഷാരൂഖ് ഖാന്‍ ട്വീറ്റ് ചെയ്തത്. ഈ പുതിയ വീട്ടില്‍ ജനാധിപത്യം സമൃദ്ധമായി പുലരട്ടെ എന്നും കമന്‍ററിയില്‍ ഷാരൂഖ് ഖാന്‍ ആശംസിക്കുന്നു.
ഇന്ത്യയുടെ വളര്‍ച്ചയുടെ സംഭവബഹുലമായ പ്രതീകമായി എന്നെന്നേയ്‌ക്കും പുതിയ പാര്ലമെന്റ് മന്ദിരം നിലകൊള്ളട്ടെ എന്നായിരുന്നു അക്ഷയ് കുമാറിന്റെ ട്വീറ്റ്. അദ്ദേഹവും മോദി പങ്കുവെച്ച പുതിയ പാര്ലമെന്റ് മന്ദിരത്തിന്റെ വീഡിയോ വീണ്ടും പങ്കുവെച്ചു. അക്ഷയ്കുമാറും സ്വന്തം ശബ്ദത്തിലാണ് വീഡിയോയ്‌ക്ക് കമന്‍ററി നല്‍കിയിരിക്കുന്നത്. “പണ്ട് അച്ഛനമമ്മാര്‍ക്കൊപ്പം ഇന്ത്യാഗേറ്റ് സന്ദര്‍ശിക്കുമ്പോള്‍ ചുറ്റുമുള്ള മിക്ക കെട്ടിടങ്ങളും ബ്രിട്ടീഷുകാര്‍ നിര്‍മ്മിച്ചതാണ്. എന്നാല്‍ ഇത് പുതിയ ഇന്ത്യയാണ്. എന്റെ ഹൃദയം അഭിമാനത്താല്‍ നിറയുന്നു. “- അക്ഷയ് കുമാര്‍ പറയുന്നു.
രണ്ട് ബോളിവുഡ‍് നടന്മാര്‍ക്കും മോദി നല്‍കുന്ന മറുപടി ഇതാണ്:”നിങ്ങള്‍ നിങ്ങളുടെ ചിന്തകള്‍ വളരെ നന്നായി അറിയിച്ചു. നമ്മുടെ പുതിയ പാര്ലമെന്റ് ജനാധിപത്യത്തിന്റെ ദീപസ്തംഭമാണ്. നമ്മുടെ രാജ്യത്തിന്റെ സമ്പന്നമായ പൈതൃകവും ഭാവിയെക്കുറിച്ചുള്ള തുടിപ്പാര്‍ന്ന പ്രതീക്ഷകളും അത് പ്രതിഫലിപ്പിക്കുന്നു.”
തമിഴ് ജനതയ്‌ക്ക് അഭിമാനമുണ്ടാക്കുന്ന രീതിയില്‍ തമിഴ് പാരമ്പര്യത്തിന്റെ ചിഹ്നമായ ചെങ്കോല്‍ പുതിയ പാര്‍ലമെന്‍റില്‍ തിങ്ങളുന്നുവെന്നും ഇതിന് പ്രധാനമന്ത്രിയ്‌ക്ക് നന്ദിയുണ്ടെന്നുമാണ് രജനീകാന്ത് ട്വീറ്റ് ചെയ്തത് തമിഴ്നാടിന്റെ മഹത്തായ സംസ്കാരത്തില്‍ ഇന്ത്യ മുഴുവന്‍ അഭിമാനം കൊള്ളുന്നുവെന്നായിരുന്നു തമിഴില്‍ കുറിച്ച മറുപടി ട്വീറ്റില്‍ മോദി പറഞ്ഞത്.
പുതിയ ഇന്ത്യയുടെ കുതിപ്പിന് ചെങ്കോല്‍ പ്രതീകമാകുമ്പോള്‍ അത് രാജ്യത്തെ നന്മയുടെയും നീതിയുടെയും വഴിയിലൂടെ ഐശ്വര്യത്തിലേക്ക് നയിക്കുമെന്ന് ഉറപ്പുണ്ടെന്ന് പി.ടി. ഉഷ ട്വീറ്റ് ചെയ്തു.
പ്രതികരിക്കാൻ ഇവിടെ എഴുതുക: