വാഷിംഗ്ടണ്‍: രണ്ടാഴ്ച കഴിഞ്ഞാല്‍ അമേരിക്കയുടെ ട്രഷറി പൂട്ടേണ്ടി വരുമെന്ന മുന്നറിയിപ്പുമായി ട്രഷറി സെക്രട്ടറി ജാനെറ്റ് യെല്ലന്‍. ഇതോടെ വീണ്ടും ആഗോള വിപണിയില്‍ ആശങ്കയുടെ കരിനിഴല്‍ പടര്‍ന്നു. ഇന്ത്യയിലെ ഓഹരി വിപണി വരെ ഇതിന്റെ പേരില്‍ ഇടിഞ്ഞു.
മിക്കവാറും ജൂണ്‍ ഒന്നിന് ട്രഷറി പൂട്ടേണ്ടിവരുമെന്നാണ് ജാനറ്റ് യെല്ലന്‍ പറയുന്നത്. ട്രഷറി പൂട്ടുന്നതിനെ എക്സ് ഡേറ്റ് (X-date) എന്നാണ് വിശേഷിപ്പിക്കുന്നത്. അതായത് ജൂണ്‍ ഒന്നാണ് എക്സ് ഡേറ്റ് എന്നര്‍ത്ഥം.
കക്ഷി രാഷ്‌ട്രീയം അമേരിക്കയ്‌ക്ക് തലവേദനയാവുകയാണ്. ബൈഡന്റെ ഡെമോക്രാറ്റിക് പാര്‍ട്ടിയും ഡൊണാള്‍ഡ് ട്രംപിന്റെ റിപ്പബ്ലിക്കന്‍ പാര്‍ട്ടിയും കടമെടുപ്പ് പരിധി ഉയർത്തുന്നതിൽ സമവായത്തിലെത്തുന്നില്ല. ഇതാണ് ട്രഷറി പൂട്ടുന്നതിലേക്ക് എത്തിച്ചത്.
ഇതിനാൽ വൻകിട നിക്ഷേപകരെല്ലാം സ്വർണത്തിലേക്കും ബിറ്റ്‌കോയിനിലേക്കും തിരിയുകയാണ്. ട്രഷറിയിൽ നീക്കിയിരിപ്പ് ഇല്ലാതാകുന്നതോടെ കടമെടുപ്പ് പരിധി ഉയർത്തുക മാത്രമാണ് ഏക പോംവഴി. റിപ്പബ്ലിക്കന്മാർ അതിനു വഴങ്ങാത്തതാണ് അതീവ ഗുരുതര സ്ഥിതിയിലേക്ക് അമേരിക്കയെ എത്തിച്ചത്. ഈ രണ്ട് പാര്‍ട്ടികളും തമ്മില്‍ ട്രംപിന്റെ ഇംപീച്ച് മെന്‍റോടെ വലിയ ശത്രുതയിലേക്ക് പോയതാണ് പ്രതിസന്ധിക്ക് കാരണമാവുന്നത്.
ജൂൺ ഒന്നിനാണ് ട്രഷറി അടയ്‌ക്കേണ്ടി വരുന്ന ദിവസം. ശമ്പളവും പെൻഷനും ഉൾപ്പെടെ മുടങ്ങാം. സർക്കാർ നേരിട്ടു പണം നൽകുന്ന നിർമാണ പ്രവർത്തനങ്ങളും നിലയ്‌ക്കും. പ്രതിരോധ ചെലവിന് അല്ലാതെ പണം നൽകാൻ പ്രസിഡന്‍റ് ജോ ബൈഡന് അധികാരം ഇല്ലാതാകും. ബരാക് ഒബാമയുടെ കാലത്ത് നിരവധി തവണ ട്രഷറി പൂട്ടേണ്ടി വന്നെങ്കിലും അതിലേറേ ആഘാതമുണ്ടാക്കും ഇപ്പോഴത്തെ പ്രതിസന്ധി എന്നാണ് മുന്നറിയിപ്പ്.
വൻകിട നിക്ഷേപകർ ഓഹരി വിപണിയില്‍ നിന്ന് സ്വർണത്തിലേക്കും ബിറ്റ് കോയിനിലേക്കും തിരിയുകയാണ്.
പ്രതികരിക്കാൻ ഇവിടെ എഴുതുക: