കോട്ടയം: കേരളത്തിലെ പോലീസ് സംവിധാനം കുത്തഴിഞ്ഞ നിലയിലെന്ന് കേന്ദ്ര വിദേശകാര്യ സഹമന്ത്രി വി. മുരളീധരന്‍. ഉദ്യോഗസ്ഥര്‍ നിരായുധരും നിസഹായരുമായ അവസ്ഥയിലാണുള്ളത്. അതുകൊണ്ടാണ് ഡോ. വന്ദന പോലീസിന്റെ കണ്‍മുന്നില്‍ കൊല ചെയ്യപ്പെട്ടത്. സേന നിര്‍വീര്യമായി തുടരുന്നത് എന്തുകൊണ്ടെന്നത് ഗൗരവമായി പരിശോധിക്കപ്പെടേണ്ടതാണ്.
കൊട്ടാരക്കര താലൂക്ക് ആശുപത്രിയില്‍ ഡ്യൂട്ടിക്കിടെ കൊല്ലപ്പെട്ട ഡോക്ടര്‍ വന്ദന ദാസിന് വീട്ടിലെത്തി അന്തിമോപചാരം അര്‍പ്പിച്ചശേഷം മാധ്യമങ്ങളോട് സംസാരിക്കുകയായിരുന്നു വി. മുരളീധരന്‍. സ്ത്രീ സുരക്ഷ ഉറപ്പാക്കാന്‍ എന്തെങ്കിലും പദ്ധതി ഉണ്ടെങ്കില്‍ പിണറായി വിജയന്‍ അത് ജനങ്ങളോട് വിശദീകരിക്കണം.
കൊട്ടാരക്കരയില്‍ സംഭവിച്ചതില്‍ വീഴ്ച വരുത്തിയവര്‍ക്ക് എതിരെ നടപടി ഉണ്ടാകണം. ഡോ. വന്ദന ദാസിന് എതിരെ നടത്തിയ വിവാദ പ്രസ്താവനയില്‍ ആരോഗ്യമന്ത്രി മാപ്പ് പറയണം. അക്രമികള്‍ക്ക് ഒപ്പമാണ് സര്‍ക്കാര്‍ എന്ന സന്ദേശം നല്കുന്ന അപക്വമായ പ്രതികരണമാണ് വീണ ജോര്‍ജിന്റെ ഭാഗത്ത് നിന്നുണ്ടായത് എന്നും കേന്ദ്രമന്ത്രി പറഞ്ഞു.
പ്രതികരിക്കാൻ ഇവിടെ എഴുതുക: