സുദീപ്തോ സെന് സംവിധാനം ചെയ്ത ‘കേരള സ്റ്റോറി’ മനസ്സിനെ പിടിച്ചുലച്ചു. ലോകത്തിന്റെ പല ഭാഗങ്ങളില് നിന്നായി ജിഹാദികളുടെ വലയില് കുടുങ്ങിയെത്തിയ സ്ത്രീകളില് ഒരാളുടെ കൊച്ചു മകള് ഹിജാബ് ചുരുട്ടി തീക്കുണ്ഠത്തിലേക്ക് വലിച്ചെറിയുന്ന ഒരു രംഗമുണ്ട് സിനിമയുടെ അവസാനത്തില്. ഇത് കണ്ട് കാണികള് കൈയ്യടിച്ചു. ചുറ്റും കൂടിയ ലൈംഗിക അടിമകളുടെ കൂട്ടത്തില് ആഫ്രിക്കക്കാരും യുറോപ്യന് വംശജരും ഏഷ്യക്കാരും എല്ലാം ഉണ്ട്. അവരില് ഹിജാബ് വലിച്ചൂരി എരിയുന്ന തീയിലേക്ക് എറിയുമ്പോഴാണ് കുഞ്ഞിന്റെ മുടി സ്വര്ണ്ണനിറമുള്ളതാണ് എന്ന് മനസ്സിലാവുന്നത്. ഇത് കേരളത്തിന്റെ കഥമാത്രമല്ല, ലോകത്തിന്റെ കഥയാണ് എന്ന് ആ നിമിഷത്തില് നാം തിരിച്ചറിയുന്നു.
കേരളാ സ്റ്റോറി കേരളത്തെ അപമാനിക്കുന്ന സിനിമയാണ്, അത് നിരോധിക്കണം എന്നൊക്കെയായിരുന്നു കഴിഞ്ഞ ദിവസങ്ങളില് ‘മതേതര ബുദ്ധിജീവി’കളുടേയും കഥയറിതാതെ ആടുന്നത് പതിവാക്കിയ രാഷ്ട്രീയജീവികളുടേയും ബഹളം. ഇസ്ലാമിന്റെ യഥാര്ത്ഥ ശത്രുക്കളെ തുറന്ന് കാണിക്കുകയും ആ ശത്രുക്കളുടെ കമോഫ്ളാഷ്ഡ് അറ്റാക്കില്നിന്ന് കേരളത്തിലെ നിഷ്കളങ്കരായ പെണ്കുട്ടികളെ രക്ഷിക്കാനും ഉതകുന്നതാണ് ഈ സിനിമ എന്ന് ഇത് കണ്ട് തീരുമ്പോള് മുന്വിധികളില്ലാത്തവര്ക്കെല്ലാം മനസ്സിലാവും. ജിഹാദികള്ക്കെതിരെയുള്ള ഒരു സാംസ്കാരിക കലാപമാണ് ഈ സിനിമ.
ആരാണ് ഈ വിവാദം ഉണ്ടാക്കിയത്? ഇതിന്റെ പിന്നില് കേരളത്തില് നിരോധിക്കപ്പെട്ട പോപ്പുലര് ഫ്രണ്ടിന്റെ പ്രേതങ്ങളാണെന്ന് ‘ചെറിയ ബുദ്ധി’യില് ചിന്തിച്ചാല്പ്പോലും മനസ്സിലാക്കാവുന്നതാണ്. കഴിഞ്ഞ ദിവസം കൊച്ചിലെ ഒരു തിയേറ്ററിന് മുന്നില് യൂത്ത് കോണ്ഗ്രസിന്റെ കൊടിപിടിച്ച് പ്രതിഷേധിച്ചവരില് മുദ്രാവാക്യം വിളിച്ച് കൊടുക്കുന്നയാള് എസ്ഡിപിഐ സിന്ദാബാദ് എന്ന് വിളിച്ചു പോയതും, പിന്നെ തിരുത്തി വിളിച്ചതും നമ്മള് കണ്ടതാണ്. പുള്ളിപ്പുലിയുടെ പുള്ളി എത്ര മറച്ചാലും ഏതെങ്കിലും സമയത്ത് പുറത്തുചാടും. പോപ്പുലര് ഫ്രണ്ട് നിരോധിക്കപ്പെട്ടപ്പോള് കോണ്ഗ്രസ്സ്, കമ്മ്യൂണിസ്റ്റ് പാര്ട്ടികളിലേക്ക് നുഴഞ്ഞുകയറി രക്ഷപ്പെടുകയായിരുന്നു അവര്. ഒരു കലാസൃഷ്ടി പോലും കാണാത്ത ഇത്തരക്കാരുടെ ആവേശത്തിന് വഴങ്ങി അത് നിരോധിക്കണം എന്നുപറയുന്നവരെ ദൈവം രക്ഷിക്കട്ടെ.
കേരളത്തിലെ ഒരു മുസ്ലിംപള്ളിയില് ഹിന്ദുപെണ്കുട്ടിയുടെ വിവാഹം നടത്തുന്നതിന് സൗകര്യമൊരുക്കുന്ന ചിത്രം എ.ആര് റഹ്മാന് പങ്കുവെച്ചത് ചിലര് ആഘോഷിച്ചു. ഇതാണ് യഥാര്ഥ കേരള സ്റ്റോറി എന്നായിരുന്നു അവരുടെ അവകാശ വാദം. സത്യത്തില് ഇതിനെ പേരിട്ട് വിളിക്കേണ്ടത് കേരള സ്റ്റോറിയെന്നല്ല, ഭാരത സ്റ്റോറി എന്നാണ്. സെന്റ് തോമസിനേയും, മാലിക്ക് ദിനാറിനേയും സ്വീകരിച്ച് ചര്ച്ചും, പള്ളിയും നിര്മ്മിക്കാന് സൗകര്യം ചെയ്ത് കൊടുത്ത മഹത്തായ ഒരു പാരമ്പര്യമുണ്ട് ഭാരതത്തിന്. ആ പാരമ്പര്യത്തിന്റെ പേരാണ് സനാതന സംസ്കാരം എന്നത്. ലോകത്തിന്റെ പല ഭാഗങ്ങളില് നിന്ന് ആട്ടിയോടിക്കപ്പെട്ട മനുഷ്യരെ മഹത്തായ ഈ ദേ
ശം രണ്ട് കൈയ്യും നീട്ടി സ്വീകരിക്കുകയായിരുന്നു. പാലില് പഞ്ചസാരയെന്ന പോലെ ഈ നാടിന്റെ ഭാഗമായി തീര്ന്നത് ഈ സംസ്കാരത്തിന്റെ സവിശേഷതയാണ്. മാര്ക്സിന്റെ പുസ്തകങ്ങളില് തിരഞ്ഞാല് ഈ ഭാരതസ്റ്റോറി കണ്ടെന്നുവരില്ല. ഇറാനില് നിന്ന് ഇസ്ലാം ആട്ടിയോടിച്ച സൗരാഷ്ട്രരേയും, ടിബറ്റില് നിന്ന് കമ്മ്യൂണിസ്റ്റ് ചൈന ഓടിച്ച ദലൈലാമയേയും കൂട്ടരേയും സ്വീകരിച്ച സംസ്കാരത്തിന്റെ പേര് ഭാരത സ്റ്റോറി എന്നാണ്.
കാലം മാറുകയാണ്. ചരിത്രത്തിലായാലും കലയിലായാലും കമ്മ്യൂണിസ്റ്റുകള് കാലാകാലങ്ങളായി ഉണ്ടാക്കിവെച്ച വരട്ട് വ്യാഖ്യാനങ്ങള് പാടേ പൊളിച്ചെഴുതപ്പെടുകയാണ്. ഒരാശയത്തെയും പിന്പറ്റാത്ത കോണ്ഗ്രസ്സിന്റെ കുടുംബമഹിമാ പ്രഘോഷണങ്ങള്ക്ക് ഇനി നാട്ടില് വേരോട്ടമുണ്ടാകില്ല. ആവിഷ്കാരസ്വാതന്ത്ര്യം എന്നത് സ്വന്തം സൗകര്യത്തിന് എടുത്ത് വിരിക്കാന് സ്വന്തം കക്ഷത്ത്് കൊണ്ടുനടക്കുന്ന മടക്കുപായയല്ലെന്ന് ഇപ്പോള് ചിലരെങ്കിലും തിരിച്ചറിഞ്ഞ് തുടങ്ങിയിരിക്കുന്നു. സുദീപ്തോ സെന്നിനെയും സംഘത്തെയും ആക്രമിച്ച് ഓടിച്ച ജെഎന്യുവില് ഇന്ന് അതേ സംവിധായകന്റെ കേരള സ്റ്റോറി നിറഞ്ഞ സദസ്സില് പ്രദര്ശിപ്പിക്കപ്പെട്ടു. കാലത്തിന്റെ മാറ്റത്തിന് ഏറെ മനോഹാരിതയുണ്ട്. ഈ മാറ്റത്തിന്റെ സത്തയെന്തെന്ന് മനസ്സിലാക്കിയാല് എല്ലാം എളുപ്പത്തില് കണ്ട് മനസ്സിലാക്കാന് കഴിവുള്ള പുതിയ തലമുറയ്ക്ക് മുന്നില് കൂടുതല് വഷളാവേണ്ടി വരില്ലെന്ന് കമ്മ്യൂണിസ്റ്റുകള് ചിന്തിച്ചാല് നന്ന്.
ജന്മഭൂമി ഓണ്ലൈന്