ഐബിഎ പുരുഷ ലോക ബോക്സിംഗ് ചാമ്പ്യന്‍ഷിപ്പ് : സച്ചിന്‍ സിവാച്ച് പ്രീ ക്വാര്‍ട്ടറില്‍, കസാക്കിസ്ഥാന്റെ മഖ്മൂദ് സാബിര്‍ഖാനെ നേരിടും

താഷ്‌കന്റ് :  ഉസ്ബെക്കിസ്ഥാനിലെ താഷ്‌കന്റില്‍ നടന്നുവരുന്ന ഐബിഎ പുരുഷ ലോക ബോക്സിംഗ് ചാമ്പ്യന്‍ഷിപ്പില്‍ 54 കിലോഗ്രാം വിഭാഗത്തില്‍ ഇന്ത്യയുടെ  സച്ചിന്‍ സിവാച്ച് മോള്‍ഡോവയുടെ സെര്‍ഗെ നൊവാക്കിനെ പരാജയപ്പെടുത്തി  പ്രീ ക്വാര്‍ട്ടറിലെത്തി.ഇന്ന് നടക്കുന്ന പ്രീക്വാര്‍ട്ടറില്‍ ടോപ് സീഡ് കസാക്കിസ്ഥാന്റെ മഖ്മൂദ് സാബിര്‍ഖാനെ നേരിടും.

92 കിലോഗ്രാം വിഭാഗത്തില്‍ നവീന്‍ സ്പെയിനിന്റെ എന്‍മാനുവല്‍ റെയ്സിനോട് 0-5ന് പരാജയപ്പെട്ടു.48 കിലോഗ്രാം വിഭാഗത്തില്‍ ഗോവിന്ദ് സാഹ് ടോപ് സീഡ് ജോര്‍ജിയയുടെ സഖില്‍ അലഖ്വെര്‍ദോവിനോട്  0-5ന് തോറ്റു. 51 കിലോയില്‍ ദീപക്, 71 കിലോയില്‍ നിശാന്ത് ദേവ്, 67 കിലോയില്‍ ആകാശ് സാങ്വാന്‍ എന്നിവരും  പ്രീ ക്വാര്‍ട്ടര്‍ പോരാട്ടങ്ങളില്‍ ഇന്ന് ഇറങ്ങും.

51 കിലോയില്‍ ദീപക് ചൈനയുടെ ജിയാമാവോ ഷാങ്ങിനെ നേരിടുമ്പോള്‍ നിശാന്ത് ദേവ് പലസ്തീന്റെ നിദാല്‍ ഫൊഖാഹയെ നേരിടും. കസാക്കിസ്ഥാന്റെ ദുലത് ബെക്ബൗവിനെതിരെയാണ് ആകാശ് സാംഗ്വാന്‍ കളത്തിലിറങ്ങുക.

107 രാജ്യങ്ങളില്‍ നിന്നുള്ള ഒളിമ്പിക്സ് മെഡല്‍ ജേതാക്കളടക്കം 538 ബോക്സര്‍മാര്‍ പങ്കെടുക്കുന്ന ടൂര്‍ണമെന്റാണ്  നടക്കുന്നത്. മേയ് ഒന്നിന് ആരംഭിച്ച ടൂര്‍ണമെന്റ് 14ന് അവസാനിക്കും.