പാലക്കാട്: തൃത്താല കപ്പൂർ പഞ്ചായത്തിലെ കാഞ്ഞിരത്താണിയിൽ സഹോദരന്മാരുടെ വീടുകൾക്കുനേരേ ബോംബേറ്. വെള്ളിയാഴ്ച പുലർച്ചെ നടന്ന ആക്രമണത്തിൽ നാലു വാഹനങ്ങളും ഒരു വീടും തകർന്നു. പുക ശ്വസിച്ചതിനെ തുടര്‍ന്നുണ്ടായ ആരോഗ്യ പ്രശ്‌നങ്ങളെ തുടര്‍ന്ന് നാല് പേരെ ആശുപത്രിയില്‍ പ്രവേശിപ്പിച്ചു. പാരിക്കുന്നത്ത് ഫൈസല്‍, ഇയാളുടെ സഹോദരന്‍ അഷ്‌റഫ് എന്നിവരുടെ വീടുകളാണ് ആക്രമിക്കപ്പെട്ടത്.
നാലു കുട്ടികളും രണ്ടു സ്ത്രീകളും ഉൾപ്പെടെ ആറുപേർ ആക്രമണം നടന്ന ഒരു വീട്ടിലുണ്ടായിരുന്നു. വ്യാഴാഴ്ച പുലര്‍ച്ചെ ഫൈസലിന്റെ വീട്ടിലെത്തിയ അജ്ഞാത സംഘം വീടിന് മുന്നില്‍ നിര്‍ത്തിയിട്ടിരുന്ന മോട്ടോര്‍ സൈക്കിള്‍ കത്തിച്ചിരുന്നു. ഇതിന് പിന്നാലെ വെള്ളിയാഴ്ച വീണ്ടും ആക്രമണം ഉണ്ടാവുകയായിരുന്നു. പുലര്‍ച്ചെ 1.30ന് വാഹനങ്ങളിലെത്തിയ അക്രമി സംഘം ഫൈസലിന്റെ സഹോദരന്‍ അഷ്‌റഫിന്റെ വീടിന് മുന്നില്‍ നിര്‍ത്തിയിട്ടിരുന്ന കാറിന് തീയിടുകയായിരുന്നു.
തീപിടിച്ച കാര്‍ വലിയ ശബ്ദത്തോടെ പൊട്ടിത്തെറിക്കുകയും വീടിന് തീപിടിക്കുകയുമായിരുന്നു. വീടിന്റെ ജനലും ഉള്‍ഭാഗവും കത്തിനശിച്ചു. ഇതേസമയത്ത് തന്നെ ഫൈസലിന്റെ വീടിന് നേരെ കല്ലെറിയുകയും ജനലുകള്‍ അടിച്ചുതകര്‍ക്കുകയും ചെയ്തു. വീടിന് മുന്നില്‍ നിര്‍ത്തിയിട്ടിരുന്ന ലോറിക്ക് തീയിടുകയും മറ്റൊന്ന് അടിച്ചുതകര്‍ക്കുകയും ചെയ്തു. ശബ്ദം കേട്ട് നാട്ടുകാര്‍ ഓടിക്കൂടിയപ്പോഴേക്കും അക്രമികള്‍ രക്ഷപ്പെടുകയായിരുന്നു. തുടര്‍ന്ന് നാട്ടുകാര്‍ തീയണച്ചു.
പ്രതികരിക്കാൻ ഇവിടെ എഴുതുക: