ന്യൂദല്ഹി: യുഎപിഎ കേസില് ദല്ഹി സര്വ്വകലാശാലയിലെ മുന് പ്രൊഫസര് ജി.എന്. സായിബാബയെ കുറ്റവിമുക്തനാക്കിയ ബോംബെ ഹൈക്കോടതി നടപടി സുപ്രീംകോടതി റദ്ദാക്കി. കേസില് വീണ്ടും വാദം കേള്ക്കാനും നാലു മാസത്തിനുള്ളില് തീര്പ്പാക്കാനും ബോംബെ ഹൈക്കോടതിയോട് സുപ്രീംകോടതി നിര്ദേശിച്ചു.
ജസ്റ്റിസുമാരായ എം.ആര്. ഷാ, സി.ടി. രവികുമാര് എന്നിവരടങ്ങിയ ബെഞ്ചിന്റേതാണ് ഉത്തരവ്. മഹാരാഷ്ട്ര സര്ക്കാരാണ് ഹൈക്കോടതി വിധിക്കെതിരെ സുപ്രീംകോടതിയെ സമീപിച്ചത്. ഹൈക്കോടതി വിധി നേരത്തെ സുപ്രീംകോടതി സസ്പെന്ഡ് ചെയ്തിരുന്നു.
സായിബാബ ഉള്പ്പെടെ നാലു പ്രതികള്ക്കെതിരേ പ്രോസിക്യുഷന് അനുമതി ലഭിക്കാതെയാണ് യുഎപിഎ പ്രകാരമുള്ള വിചാരണ നടന്നതെന്നായിരുന്നു ഹൈക്കോടതിയുടെ കണ്ടെത്തല്. യുഎപിഎ പ്രകാരം ചട്ടം പാലിക്കാതെ വിചാരണ ചെയ്യാന് അനുമതി നല്കിയതുതന്നെ നിയമത്തിനു കളങ്കമാണെന്നും ബോംബെ ഹൈക്കോടതി വിധിച്ചിരുന്നു.
2017 മാര്ച്ചില്, മഹാരാഷ്ട്രയിലെ ഗഡ്ചിരോളി ജില്ല സെഷന്സ് കോടതിയാണ് സായിബാബയേയും മറ്റുള്ളവരേയും ശിക്ഷിച്ചത്. സായിബാബയ്ക്ക് പുറമെ ദല്ഹി ജവാഹര്ലാല് നെഹ്റു സര്വകലാശാല വിദ്യാര്ത്ഥി ഹേം മിശ്ര, പ്രശാന്ത് സാംഗ്ലിക്കര്, മഹേഷ് ടിര്ക്കി, പാണ്ഡു നരോതെ എന്നിവര്ക്കും ജീവപര്യന്തം തടവു വിധിച്ചിരുന്നു. മറ്റൊരു പ്രതി വിജയ് ടിര്ക്കിയെ 10 വര്ഷം തടവിനും വിചാരണ കോടതി ശിക്ഷിച്ചിരുന്നു. ഈ വിധി റദ്ദാക്കിയാണ് ബോംബെ ഹൈക്കോടതി സായിബാബ ഉള്പ്പെടെയുള്ളവരെ വെറുതെ വിട്ടത്.
ഹൈക്കോടതി കുറ്റമുക്തനാക്കിയിരുന്നെങ്കിലും സുപ്രീംകോടതി ഉത്തരവ് സ്റ്റേ ചെയ്തതിനാല് സായിബാബയ്ക്ക് ജയില് മോചിതനാകാന് സാധിച്ചിരുന്നില്ല. 2014ല് അറസ്റ്റിലായതു മുതല് നാഗ്പൂര് സെന്ട്രല് ജയിലിലാണ് സായിബാബ. എച്ച് 1 എന് 1 പനി ബാധിച്ച പാണ്ഡു നരോതെ കഴിഞ്ഞ വര്ഷം ആഗസ്തില് ജയിലില് മരിച്ചു
