കൊല്‍ക്കത്ത: മുതിർന്ന തൃണമൂല്‍ കോണ്‍ഗ്രസ് നേതാവും മുൻ കേന്ദ്ര റയിൽവേ മന്ത്രിയുമായ മുകുള്‍ റോയിയെ കാണാനില്ലെന്ന് മകന്റെ പരാതി. തിങ്കളാഴ്ച വൈകുന്നേരം ഇന്‍ഡിഗോയുടെ ജി.ഇ 898 വിമാനത്തില്‍ ദല്‍ഹിലേക്ക് പോയ തന്റെ പിതാവിനെ കുറിച്ച് ഒരു വിവരവുമില്ലെന്നാണ് മകന്‍ സുഭര്‍ഗ്ഷു റോയി പരാതി നല്‍കിയിരിക്കുന്നത്.
വിമാനത്താവള പോലീസിനാണ് പരാതി നല്‍കിയിരിക്കുന്നത്. എന്നാല്‍ തങ്ങള്‍ക്ക് പരാതി ലഭിച്ചിട്ടില്ലെന്നാണ് പോലീസ് അറിയിച്ചത്. രാത്രി 9.55ന് വിമാനം ദല്‍ഹിയില്‍ എത്തി. എന്നാല്‍ പിതാവിനെ ബന്ധപ്പെടാന്‍ ശ്രമിച്ചിട്ടും കിട്ടുന്നില്ലെന്നാണ് തൃണമൂല്‍ നേതാവ് കൂടിയായ സുഭര്‍ഗ്ഷുവിന്റെ പരാതി. തിങ്കളാഴ്ച അച്ഛനും മകനും വഴക്കുണ്ടായെന്ന് ബന്ധുക്കളെ ഉദ്ധരിച്ച് ദേശീയ മാധ്യമങ്ങള്‍ റിപ്പോര്‍ട്ട് ചെയ്യുന്നുണ്ട്.
ഭാര്യയുടെ മരണശേഷം ശാരീരിക ബുദ്ധിമുട്ടുകളുണ്ടായ മുകുള്‍ റോയിയെ ഫെബ്രുവരിയില്‍ ആശുപത്രിയില്‍ പ്രവേശിപ്പിച്ചിരുന്നു. മുകുള്‍ റോയി കഴിഞ്ഞ ഒന്നരവര്‍ഷമായി രാഷ്‌ട്രീയത്തില്‍ സജീവമല്ല. തൃണമൂലിന്റെ സ്ഥാപക നേതാക്കളില്‍ ഒരാളാണ് മുകുള്‍ റോയി. മമത ബാനര്‍ജിയുടെ അനന്തരവന്‍ അഭിഷേക് ബാനര്‍ജിക്ക് പാര്‍ട്ടിയില്‍ ലഭിക്കുന്ന അമിത പ്രാധാന്യത്തില്‍ പ്രതിഷേധിച്ച് ബിജെപിയില്‍ ചേര്‍ന്നു. പിന്നീട് 2017ല്‍ ബിജെപി വിട്ടു. നാല് വര്‍ഷത്തിന് ശേഷം വീണ്ടും തന്റെ പഴയ പാര്‍ട്ടിയിലേക്ക് മടങ്ങിയെത്തുകയുമായിരുന്നു.
പ്രതികരിക്കാൻ ഇവിടെ എഴുതുക: