തൃശൂര് : അതിഥി തൊഴിലാളികള് തമ്മിലുള്ള ഏറ്റുമുട്ടലിനിടെ ആറ് വയസ്സുകാരന് വെട്ടേറ്റ് മരിച്ചു. മുപ്ലിയത്ത് ആണ് സംഭവം. അതിഥി തൊഴിലാളിയുടെ മകനായ നാജുര് ഇസ്ലാം ആണ് മരിച്ചത്. കുട്ടിയുടെ അമ്മ നജ്മക്ക് ഗുരുതരമായി വെട്ടേറ്റു. ഇവര് തൃശൂര് മെഡിക്കല് കോളേജില് ചികിത്സയിലാണ്.
തൊഴിലാളികള് തമ്മിലുള്ള വാക്കു തര്ക്കമാണ് സംഘര്ഷത്തിലേക്ക് എത്തിയത്. അമ്മാവന് ജമാലുവിനെ പോലീസ് കസ്റ്റഡിയില് എടുത്തിട്ടുണ്ട്. രണ്ട് കുടുംബങ്ങള് തമ്മിലുള്ള സ്വത്ത് തര്ക്കമാണ് കൊലപാതകത്തില് കലാശിച്ചതെന്നാണ് സൂചന.
ബുധനാഴ്ച രാത്രിയില് രണ്ട് കുടുംബങ്ങള് തമ്മിലുണ്ടായ തര്ക്കം ഇന്ന് രാവിലെയും തുടര്ന്നു. തര്ക്കത്തിനിടെ ഇവര് പരസ്പരം കത്തിയും മറ്റ് ആയുധങ്ങളും എടുത്ത് വീശി. ഇതിനിടയില്പ്പെട്ടാണ് കുട്ടി കൊല്ലപ്പെട്ടത്. സംഭവത്തില് ഏതാനും അതിഥിതൊഴിലാളികളെ പോലീസ് കസ്റ്റഡിയിലെടുത്തു.
