ലണ്ടന്: കഴിഞ്ഞ പതിനഞ്ച് കളിയില് രണ്ടു ജയവുമായാണ് തട്ടകമായ സ്റ്റാംഫോഡ് ബ്രിഡ്ജില് ചെല്സി ഇറങ്ങിയത്. ചാമ്പ്യന്സ് ലീഗിലെ നിര്ണായകമായ രണ്ടാംപാദ പ്രീ ക്വാര്ട്ടറില് ജര്മ്മന് കരുത്തര് ബൊറൂസിയ ഡോര്ട്ട്മുണ്ടിനെ എതിരിടാന്. ഒരു ഗോള് പിന്നില് ഇറങ്ങിയ നീലപ്പട രണ്ടു ഗോള് ജയവുമായി തിരിച്ചു കയറി. ആകെ 2-1 ജയത്തോടെ മുന് ചാമ്പ്യന്മാരായ ചെല്സി ക്വാര്ട്ടറില്.
റഹിം സ്റ്റെര്ലിങ്ങും കെയ് ഹാവെര്ട്സുമാണ് ചെല്സിക്കായി ഗോള് നേടിയത്. ജയിച്ചേ തീരുവെന്ന ലക്ഷ്യത്തിലിറങ്ങിയ നീലപ്പട 43-ാം മിനിറ്റില് സ്റ്റെര്ലിങ്ങിലൂടെ മുന്നില്. ബെന് ചിവാലി നല്കിയ പന്ത് ബോക്സിനുള്ളില് ആദ്യം സ്റ്റെര്ലിങ്ങിന് കണക്ട് ചെയ്യാനായില്ല. എന്നാല്, മാര്ക്കൊ റ്യൂസ് അപകടം ഒഴിവാക്കുന്നതിനു മുന്പ് പന്ത് പിടിച്ചെടുത്ത സ്റ്റെര്ലിങ് സ്കോര് ചെയ്തു.
രണ്ടാം പകുതിയില് ലഭിച്ച പെനല്റ്റി ഗോളാക്കിയാണ് ഹാവെര്ട്സ് നീലപ്പടയെ മുന്നോട്ടു നയിച്ചത്. ഹാന്ഡ്ബോളിന് ലഭിച്ച പെനല്റ്റി ആദ്യം ഹാവെര്ട്സ് അടിച്ചത് പോസ്റ്റില് തട്ടിത്തെറിച്ചു. എന്നാല്, കിക്കെടുക്കും മുന്പ് ബൊറൂസിയ താരങ്ങള് ലൈനില് നിന്ന് മുന്നേറിയതിനാല് വീണ്ടും കിക്ക് അനുവദിച്ചു. രണ്ടാമതും കിക്കെടുത്ത ഹാവെര്ട്സ് പന്ത് വലയിലെത്തിച്ചു.
