കൊച്ചി : നടന് ബാല ഗുരുതരാവസ്ഥയില് ആശുപത്രിയില് ചികിത്സയിലെന്ന് റിപ്പോര്ട്ടുകള്. കരള്, ഹൃദയ സംബന്ധമായ അസുഖങ്ങളെ തുടര്ന്ന് ചികിത്സ തേടിയതെന്നാണ് സൂചന. ബാലക്ക് കുറച്ചു ദിവസങ്ങളായി ഭക്ഷണം കഴിക്കാന് പ്രയാസം നേരിട്ടിരുന്നു. തുടര്ന്ന് കൊച്ചിയിലെ സ്വകാര്യ ആശുപത്രിയില് ചികിത്സ തേടുകയായിരുന്നെന്നാണ് വിവരം.
നിലവില് ബാല ഐസിയുവിലാണെന്നാണ് അറിയുന്നത്. കരള്രോഗ സംബന്ധമായ അസുഖങ്ങളെ തുടര്ന്ന് ഒരാഴ്ച മുമ്പ് ബാല ആശുപത്രിയില് ചികിത്സ തേടിയിരുന്നു. ഏറെ നാളായി സിനിമയില് നിന്ന് വിട്ടു നിന്നിരുന്ന ബാല അടുത്തിടെ അഭിനയിത്തിലേക്കു മടങ്ങി വന്നിരുന്നു. അതുപോലെ സോഷ്യല് മീഡിയയിലും സജീവമാണ്. ബാലയുടെ ഭാര്യ എലിസബത്തുമായും ബാല സമൂഹ മാധ്യമങ്ങളിലൂടെ തന്റെ വിശേഷങ്ങള് പങ്കുവെയ്ക്കാറുണ്ട്.
സാമൂഹ്യ സേവന രംഗത്തും ബാല എന്നും നിലകൊണ്ടിട്ടുള്ള വ്യക്തിയാണ്. നടി മോളി കണ്ണമാലി ഉള്പ്പെടെ നിരവധിപ്പേര്ക്ക് രോഗചികിത്സയ്ക്കുള്പ്പെടെയുള്ള ചികിത്സാ സഹായം ലഭ്യമാക്കുന്നതിനായി ബാല നിലകൊണ്ടിട്ടുണ്ട്. കഴിഞ്ഞ ദിവസവും മോളി കണ്ണമാലിയും ബാലയും കൂടിയുള്ള വീഡിയോ ബാലയുടെ ഫേസ്ബുക്ക് പേജില് പ്രത്യക്ഷപ്പെട്ടിരുന്നു.
