കന്നിയങ്കത്തില്‍ ത്രിപുരയില്‍ സാന്നിധ്യമറിയിച്ചിരിക്കുന്നു തിപ്ര മോത്ത (ടിഎംപി). ത്രിപുര രാജകുടുംബത്തിന്റെ തലവനായ പ്രദ്യോത് ബിക്രം മാണിക്യ ദേബ് ബര്‍മന്റെ ടിഎംപി ബിജെപിയുടേയും സിപിഎം-കോണ്‍ഗ്രസ് സഖ്യത്തിന്റേയും വോട്ടില്‍ വിള്ളല്‍ വീഴ്‌ത്തി. വോട്ടെണ്ണലിന്റെ ഒരുഘട്ടത്തില്‍ ത്രിപുര ആര് ഭരിക്കുമെന്ന് തിപ്ര മോത്ത തീരുമാനിക്കുമെന്ന തലത്തില്‍ വരെ കാര്യങ്ങളെത്തിയിരുന്നു. ഗ്രേറ്റര്‍ തിപ്രലാന്‍ഡ്, ഗോത്ര വിഭാഗങ്ങള്‍ക്കായി ഒരു പ്രത്യേക സംസ്ഥാനമെന്ന മുദ്രവാക്യമുയര്‍ത്തിയായിരുന്നു ടിഎംപിയുടെ പ്രചാരണം. 20 മണ്ഡലങ്ങളെ കേന്ദ്രീകരിച്ചായിരുന്നു പ്രവര്‍ത്തനമത്രയും.
ത്രിപുര പ്രദേശ് കോണ്‍ഗ്രസിന്റെ മുന്‍ പ്രസിഡന്റായിരുന്ന പ്രദ്യോത് പാര്‍ട്ടിയില്‍ നിന്ന് രാജിവച്ച് 2019ലാണ് ഗോത്ര വിഭാഗങ്ങളുടെ ക്ഷേമത്തിനായി തിപ്ര ഇന്‍ഡിജീനിയസ് പ്രോഗ്രസീവ് റീജിയണല്‍ അലയന്‍സ് (തിപ്ര) രൂപീകരിച്ചത്. 2021ല്‍ രാഷ്‌ട്രീയ പാര്‍ട്ടിയായി പ്രഖ്യാപിച്ചു. പിന്നാലെ ഇന്‍ഡിജീനിയസ് നാഷണലിസ്റ്റ് പാര്‍ട്ടി ഓഫ് തിപ്ര (ഐഎന്‍പിടി), തിപ്രലാന്‍ഡ് സ്റ്റേറ്റ് പാര്‍ട്ടി (ടിഎസ്പി), ഐപിഎഫ്ടി പാര്‍ട്ടികളും തിപ്രയുമായി ലയിച്ചു. 2021ലെ ത്രിപുര ട്രൈബല്‍ ഏരിയ കൗണ്‍സില്‍ തെരഞ്ഞെടുപ്പില്‍ മത്സരിക്കുകയും 28 സീറ്റില്‍ 18ലും വിജയിക്കുകയും ചെയ്തു.
ത്രിപുരയിലെ ഗ്രോത്ര വിഭാഗങ്ങളുടെ പിന്തുണയായിരുന്നു ടിഎംപിയുടെ ആത്മവിശ്വാസം. സംസഥാനത്തെ ജനതയുടെ മൂന്നിലൊന്നും ഇവരാണ്. നിയമസഭാ തെരഞ്ഞെടുപ്പിന് തൊട്ടു മുമ്പ് പ്രദ്യോത് മണിക്യ ദല്‍ഹിയിലെത്തി കേന്ദ്രമന്ത്രി അമിത് ഷായുമായി ചര്‍ച്ചകള്‍ നടത്തിയിരുന്നു. എന്നാല്‍ തിപ്രലാന്‍ഡ് അടക്കമുള്ള ആവശ്യങ്ങള്‍ നിരസിച്ചതോടെ ഒറ്റയ്‌ക്ക് മത്സരിക്കാന്‍ തീരുമാനിക്കുകയായിരുന്നു.
തുടര്‍ന്ന്, എല്ലാവരെയും ഞെട്ടിച്ചുകൊണ്ട് 42 സീറ്റുകളില്‍ സ്ഥാനാര്‍ഥികളെ പ്രഖ്യാപിച്ചു. തെരഞ്ഞെടുപ്പ് പ്രഖ്യാപനത്തിനു ശേഷം തന്നെ പാര്‍ട്ടിയില്‍ ഒറ്റപ്പെടുത്തുന്നുവെന്നും അതിനാല്‍ സജീവ രാഷ്‌ട്രീയ പ്രവര്‍ത്തനം അവസാനിപ്പിക്കുന്നുവെന്നും അദ്ദേഹം അറിയിച്ചിരുന്നു. തെരഞ്ഞെടുപ്പില്‍ പ്രദ്യോത് മത്സരിച്ചിരുന്നില്ല.
സംസ്ഥാനത്തെ ഗോത്രവിഭാഗങ്ങള്‍ നേരിടുന്ന പ്രശ്‌നങ്ങള്‍ക്കായി പോരാടുന്നത് തുടരുമെന്നാണ് തെരഞ്ഞെടുപ്പ് ഫലപ്രഖ്യാപനത്തിന് ശേഷം പ്രദ്യോത് പറഞ്ഞത്. തിപ്ര മോത്തയുമായി അഭിപ്രായ വ്യത്യാസമൊന്നുമില്ലെന്നും, തിപ്ര ലാന്‍ഡ് ഒഴികെയുള്ള ആവശ്യങ്ങളെല്ലാം അംഗീകരിക്കുമെന്ന നിലപാടിലുമാണ് ബിജെപി സംസ്ഥാന ഘടകം.
ജന്മഭൂമി ഓണ്‍ലൈന്‍